29.07.2012 Мәдәният

Салават та якташларын җыйды (ФОТО)

Күптән түгел генә җырчы Алсу әтисенең туган авылында зур тамаша уздырганын хәбәр иткән идек. Шушы арада Бошкортстанның Тәтешле районының Аксәет авылында туып үскән күренекле татар җырчысы Салават Фәтхетдинов та туган ягында зурлап бәйрәм оештырды.

Җиденче ел рәттән узучы бәйрәмгә нигез 2006 елда авылга 500 ел тулганда салына. Ул елны Салават Татарстаннан кунаклар чакырып, онытылмаслык тантаналар оештырып, бәйрәмне ел да оештырачагын әйтә. Кыска вакыт эчендә ул Тәтешле халкын гына түгел, башка районнар, өлкәләрдән дә милләттәш, дус, туганнарны бергә җыючы чарага әверелде. Быел бәйрәмдә Татарстан, Пермь, Удмуртиядән, Свердловск, Төмән, Владимир һәм Архангель өлкәләреннән 50 меңләп кеше җыелган.

Әйтергә кирәк, быел район хакимияте тәкъдиме белән, бу чарага республика бәйрәме дәрәҗәсе бирелде. Шулай булгач, аны үткәрү өчен авыл һәм район халкы ныклап әзерләнгән.

Әйтик, элекке тигез мәйданда тамашага килгән халык берничә сәгать буена басып торырга мәҗбүр булган. Җитмәсә артта торган кешегә сәхнә дә күренмәгән. Быел исә бәйрәм мәйданы күл буендагы аланга күчерелгән. Монда хәтта күлнең текә ярына 7 мең кеше утыра алырлык урыннар да булдырылган. Сәхнә исә күл уртасына урнаштырылган. Шулай ук монда балалар сабантуе үткәрү өчен спорт мәйданчыклары, сәүдә нокталары, машиналар кую урыннары махсус билгеләнгән.

Быел бәйрәмгә беренче тапкыр Башкортстан Президенты Рөстәм Хәмитов та килгән. “Бу тарихи вакыйга. Әлегә кадәр Аксәет авылына республика Президенты килгәне юк иде. Монысы беренче булса да, соңгысы булмасын”, — диде Салават.

Елдагыча котлаулар, кыйммәтле бүләкләр тапшыру белән беррәттән, Салаватның якташларына сюрприз ясау гадәте бар. Быел ул бүләккә “ВАЗ- 2107” автомобиле алып кайткан.

“Татарстандагы дусларым, фикердәшләрем бу чарага үз өлешләрен кертергә теләде һәм уңган, тырыш авылдашыңа бүләк итәрсең, дип өр-яңа, ап-ак “ВАЗ- 2107” автомобиле биреп кайтардылар. Авылга кайткач аптырашта калдым, кемгә бирергә дә белмим. Шушы соравым белән Әмиров исемендәге кооператив рәисе Насыйбулла Хөснуллинга мөрәҗәгать иттем һәм ул миңа хезмәт алдынгылары, бертуган Талиповларны тәкъдим итте. Илнар һәм Радик егерме елга якын фермада мал карыйлар, Илмир 15 ел тирәсе атлар белән шөгыльләнә. Әлегә кадәр алар бу хәбәрне ишетмәделәр һәм берни белмиләр, — диде Салават Зәки улы һәм уңган авылдашларын чакырып чыгарды. Әлеге вакытта әниләренең кемдә торуы белән кызыксынды. Ата-бабаларыбызның борынгыдан килгән гореф-гадәте бу юлы да сакланган — төп йортта иң кечеләре Илмир яши икән. Салават машинаны төп йортка тапшырды”, дип яза musulman.su.

Чараның тантаналы өлешен тәмамлап, Салават: “Без арыганчы җырларбыз, сез туйганчы тыңларсыз. Бүгенге концертта Тәтешле районы мәдәният сарае, Татарстан һәм Башкортстанның сәхнә осталары һәм ут күршеләребез Пермь краеннан һәм Удмуртиядән килгән коллективлар чыгыш ясаячак”, — дип көймәгә утырып сәхнәгә таба йөзеп китте һәм концертны “Кайтам әле Аксәеткә” дигән яңа җыры белән ачып җибәрде.

Бәйрәм чарасы елдагыча зур фейерверк белән тәмамланды.