Полиция бүлегеннән хастаханәгә китерелгән, аңа карата көч куллану билгеләре булган ир-ат җан биргән

Тикшерү материаллары буенча, 10 нчы март көнне 15 сәгать тирәсендә ашыгыч медицина ядәме бригадасы Казанның “Дальний” полиция бүлегеннән туры эчәге зарарланган Казанда яшәүче 52 яшьлек гражданинны 18 нче шәһәр хастаханәсенә китерә. Хирургларның оператив тыкшынуыннан соң ир-ат реанимация бүлегенә күчерелә. Әмма табиблар аның гомерен коткарып кала алмый – ир-ат хастаханәдә җан бирә.

Тикшерү фаразлаганча, 9 нчы март көнне ир-ат Административ хокук бозулар турындагы Кодексның 20.1 маддәсендә каралган вак хулиганлык өчен полициягә китерелә. Ир-атның мондый гамәлләр өчен 6 тапкыр тоткарлануы ачыкланган. 9 нчы март көнне кулга алынгач, ул эче авыртуына зарлангач ашыгыч медицина ярдәме чакыртыла, авыртуны басучы укол кадаганнан соң ул госпитализациядән баш тарта. 10 нчы март көнне ул янә эче авыртуына зарлана, бу юлы инде аны табиблар “туры эчәк өзелүе” диагнозы белән хастаханәгә алып китә, биредә ул операциядән соң үлә.

Әлеге факт буенча ТР буенча Тикшерү идарәсенең Үзәк районара бүлегендә, РФ Җинаять Кодексының көч кулланып вазифаи вәкаләтләрне арттыру (286 нчы маддә, 3 нче өлеше), зыян күрүче өстеннән мыскыллаулар кылып, сәламәтлеккә алдан уйлап авыр зыян салу (111 нче маддә, 2 нче өлеше) җинаять билгеләре буенча җинаять эше кузгатылган.

Хәзерге вакытта вакыйганың барлык нечкәлекләрен ачыклауга багышланган тикшерү гамәлләре уздырыла. Җинаять эшен тикшерү дәвам итә, дип хәбәр итә ТР буенча ТИ җитәкчесенең өлкән ярдәмчесе Эдуард Абдуллин.

Белешмә өчен. ТР Эчке эшләр министры Әсгать Сәфәров тарафыннан “Дальний” полиция бүлеге җитәкчелеген һәм берничә хезмәткәрне эшеннән азат итү турында карар кабул ителгән.