Хуҗа Насретдин “ял итә” яки Юмор-шоу “Рәвешләре”

Тамашачыга ни кирәген белми генә, сәхнәдә кәмит күрсәтеп йөреп булмый, диләр. Дөрес сүзләр. Бүген кешегә нинди юмор җитмәвен аңлау кыен булуга карамастан, юмористлар бирешми. Билдән түбән мәзәкләрне яратып тыңлый халык, тик тәнкыйтсез кабул итә алмый. Монысына да артык борчылмый алар. Көндәлек проблемалардан да мәзәк ясап көләләр, халыкны көлдерәләр... 11нче ноябрь көнне булачак “Юмор - шоу” хакында ишеткәнсездер инде. Татарның иң танылган юмористлары бер сәхнәгә җыелачак бит! “Рәвешләр” дән бу юлы нәрсә көтәргә соң? Әлеге проектның режиссер һәм сценаристы Фәрит Галиев исә шоуның серен ачты.

“Рәвешләр” юмор проекты русларның “6 кадров”ына ошатып ясалды. Тик бу аларны кабатлыйбыз дигән сүз түгел әле. Шөкер, кичәбез тулысынча әзерләнеп бетте инде. Өр яңа программабыз аеруча да көлкеле килеп чыкты. Көтелмәгән хәл, бу кичтә афроамериканецлар чыгышы булачак. Шулай ук кич дәвамында без тамашачы белән турыдан – туры эшләргә җыенабыз. Ничек килеп чыгар, анысын әлегә әйтә алмыйм. Бирегә җыелган халык шоуны карап кына утырмаячак, юмористлар белән бергә кәмит күрсәтәчәк. Әбри Хәбриев исә төрле образларга керер дип көтелә.” – диде ул.

Раил Садриев, Шәмси Закир, “Тегеләр”, Әбри Хәбриев һәм башка юмористларның кәмитләре, татар эстрадасы йолдызлары Вероника Кузнецова, Ленар Сәйфиев, Ринат Рахматуллин, Мурат Гайсин, Ильмира Нәгыймова чыгышлары белән үрелеп барачак. Бу кичтә тамашачыга ике куянны бер юлы тота алу мөмкинлеге туа, җәмәгать! Сыйфатлы юмор тыңлап, рәхәтләнеп көлү өстенә, әле тагын иң якты татар йолдызларының чыгышын да күрә алачаклар бит! Сыйфатлы юмор нинди була дисезме? Әбри Хәбриев әйтмешли, тормыштагы иң актуаль темалар чагылган проблемаларны кешегә көлке ярдәмендә күрсәтү була ул. Вәт! Алай гына да түгел, халык сәхнәдәге образлар аша үзен дә күрергә тиеш икән әле.

Татарда юмор юк, диләр. Юк, бар икән ул. Юмористлар бар, тамашачы бар. Шулай булгач юмор булмый ни булсын?! Татар эстрадасында да юмор үсештә. Юкса, юмористларыбыз яңадан – яңа проектлар әзерләп, халык тулы заллар җыя алыр идеме соң?