Чүпрәле районында терлекчелекне үстерү мәсьәләләре буенча фикер алыштылар

Татарстан Республикасының Чүпрәле муниципаль районында «Цифрлаштыру һәм заманча технологияләр кертү юлы белән терлекчелек продукциясен җитештерүнең нәтиҗәлелеген арттыру» темасына зона семинар-киңәшмәсе үтте.

Әлеге киңәшмәдә Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров,  министр урынбасарлары Гелүс Баязитов, Рафаэль Фәттахов, Чүпрәле муниципаль районы башлыгы Марат Гафаров, авыл хуҗалыгы һәм азык-төлек идарәләре башлыклары, терлекчелек буенча консультантлары, инвестиция компанияләре җитәкчеләре, хуҗалыклар җитәкчеләре һәм зоотехниклары катнашты.

“Безнең республиканың мөмкинлекләре бүгенгегә караганда күпкә югарырак. Без сезнең белән терлекчелек продукциясен җитештерүне күпкә арттыра алабыз. Моның өчен барлык шартлар да бар. Фермерларга һәм безнең инвесторларга мөрәҗәгать итәм. Терлекчелек фермалары - безнең авыл халкы өчен төп эш урыны. Терлекләр санын киметеп, без бу авылларның киләчәген куркыныч астына куябыз”, – диде Марат Җәббаров.

Бүгенге көндә республикада тәүлеклек сөт җитештерү күләме 4 мең 855 тоннадан артып китә, бу узган елгы дәрәҗәдән 281 тоннага күбрәк (106%).

Гелүс Баязитов үз чыгышында 433 мең тонна сөт җитештерелүен билгеләп үтте, узган елга карата үсеш 8%. Сөт җитештерү күләме буенча төбәкләр рейтингында республика 1 урында тора. Бер сыердан уртача тәүлеклек савым 22,5 кг тәшкил итә, 1,5 кг-га артык. Монда без төбәкләр арасында 29 нчы урында гына, гәрчә бер ел эчендә 4 позициягә күтәрелсәк тә.

1 апрельгә эре мөгезле эре терлекләр, сарыклар, кәҗәләр һәм кош-кортлар саны узган елгы дәрәҗәгә кадәр төшкән. Шул ук вакытта дуңгызлар һәм атлар саны буенча уңай динамика күзәтелә, үсеш 1 %.

Һәр районда терлекләр санын арттыручы хуҗалыклар бар, аларның санын киметүне дәвам итүчеләр дә бар. Буа районында Авангард һәм Ямбулат хуҗалыклары яхшы динамика күрсәтә. Кайбыч районының Туган як-Агро хуҗалыгында мөгезле эре терлекләр буенча да, сыерлар саны буенча да яхшы динамика. Шул ук вакытта Тәтеш районы хуҗалыкларында да сыерлар санын тотрыклы тоталар.

Аннары ул районнарда сарыклар һәм атларга тукталды. Югары Ослан, Апас һәм Тәтеш районнарында сарыклар саны узган елдагыдан арткан. Зеленодольск һәм Чүпрәле районнарында атлар саны буенча хәл тотрыклы. Буа районында шактый арткан – +212 баш, дип хәбәр итә Татарстан Республикасы Авыл хуҗалыгы һәм азык-төлек министрлыгы.