09.02.2024 Җәмгыять

Лотореядә 25 миллион сум откан

Яңа ел лотереясе уйнатылганнан соң кырык көн үткәч, суперприз яулаган бәхетле кешеләрнең берсе табылды. Ачыкланганча, җиңүче Стәрлетамак кибетләренең берсендә билет сатып алган һәм тагын өч уенчы белән 100 миллион сум суперприз бүлешкән. Бәхетле билет Санкт-Петербургтан килгән юлбарыслар тренерына эләккән, ул билетны Башкортстанда командировкада булганда сатып ала.

Җиңүченең исеме Рөстәм. Ул Санкт-Петербургта яши һәм күп сәяхәт итә. Бер сәяхәтендә ул үзенең бәхетле билетын сатып ала.

"Яңа ел алдыннан мин командировкада булдым, Уфага, Чиләбегә, Екатеринбургка бардым. Стәрлетамакка килгәч, кибеткә кереп, кассада булган соңгы дүрт билетны сатып алдым. Шунда ук билетларны фотога төшердем һәм Мәскәүдә яшәүче кызыма җибәрдем, әгәр җиңсәм, аңа акчаны бүләк итәчәгемне әйттем. Менә шулай килеп чыкты, аңа 25 миллион сум бүләк иттем, - дип сөйләде җиңүче.

Рөстәм, җиңү турында СМС алгач, үз бәхетенә ышана алмавын сөйләде.

"Иртән СМС килде, бер билет 100 сум, ә тагын бер билет 25 миллион сум отты дип әйтелде. Мин ышанмадым, тагын ниндидер реклама дип уйладым. Кызыма хәбәр җибәрдем, ә кыз: «Әти, син җиңдең!» - дип хәбәп кайтарды. Мин хәзер дә үз бәхетемне тулысынча аңлый алмыйм, - дип билгеләп үтте миллионер.

Рөстәмгә 62 яшь. Үз гомерен ул кыргый хайваннарны өйрәтүгә багышлаган.

Фото: "Башинформ" агентлыгы

Кызыл таң

Автор: Ример Насретдинов

---
Матбугат.ру
№ --- | 09.02.2024