Фирдүс Тямаев: “Резедәгә, күңелсез хәл килеп чыкса, машинаны, фатирны сат, дидем...»

– Аяк төзәлеп килә, Аллаһка шөкер. Итекне салдым. Машинада үзем йөрим инде. Аякны сакларга тырышам, аксап кына йөрим әле. Бөтен авырлык белән басарга куркам. Бу операция Германиядә ясатканына караганда да кыенрак булды. Хәзер концертларга әзерлек эшләре гөрләп бара.

– Яңа елларда әйбәт кенә банкетлар эшләдек. Аякта итек күренмәсен өчен махсус киңрәк балаклы штан тектерергә туры килде. Аякка артык “нагрузка” бирмәскә тырыштым. Төркемгә дә Яңа еллар бәйрәмнәре вакытында чыгышларына күбрәк түләдем.

– Төркемдәгеләр операция турында белгәч: “Без синең белән калабыз, абый”, – дип әйттеләр. Егетләр-кызлар ташламады. Төркемдәге кешеләрне дә гел алыштырып торасы килми, һәркемнең үз урыны.

– Узган операцияне Германиядә ясатуның сәбәбе – табиб  таба алмау иде. Аларны да аңлап була, бу катлаулы операция. Дөресен әйткәндә, Германиядә операциядән соң, сакланмадым. Кайткач ук, итекне салып ташладым, концертларга чыгып киттем. Бу юлы сәламәтлегемә җаваплырак карыйм. Ике җиргә сеңерләр үскән булган, аларны да кисеп аттылар. Операциягә кергәнче МХОда катнашучы егетләргә ярдәм җибәрдем, шуңа да күңелем тыныч. Тормыш иптәшем, Резедәгә дә: “Алай-болай күңелсез хәл килеп чыкса, машинаны, фатирны сат. Балаларның тормышы тәэмин итәргә кирәк”, – дидем. Аңа бу сүзләрне ишетү җиңел булмагандыр. Барыбызның да гомере чикле бит. Барысы Аллаһ кулында.

– Әнинең хәле яхшы, Аллаһка шөкер. Тешләр ясатып йөри әле. Имплантлар куйдыртабыз. Быел әнинең юбилее да бит. Коръән ашы үткәрә алсак, әйбәт булыр иде. Кич белән туган-тумачаларны җыеп, хәмерсез генә мәҗлес уздырырга исәп бар. 

– Гаилә белән күбрәк вакыт уздырырга тырыштым. Чыгышларга бик алынмасам да, концерт сезонына әзерлек эшләре белән шөгыльләндем. Хәзер төркем белән репетиция ясыйбыз. Ял итмәдем диярлек. Видеографлар белән күрештем, студиядә яңа җырлар яздырдым. Өйдә булгач, бик күп идеяләр туды. Мин теләгәнчә тормышка ашыра алсак, концерт узган елгы белән чагыштырганда тагын да шәбрәк булачак. 17 яңа җыр әзерләдем. Концерт 4 сәгатьтән дә ким булмаячак. Программага җырлар өстәлгәч, кайсындыр алып атырга кирәк. Тик кайбер җырларымны алып та ата алмыйм: “Гомер үтә”, “Сайра әйдә сандугач” һәм башкалар. Алар еллар буе тамашачы мәхәббәтен яулап алган җырлар. 

– Концертка чыгымнар күп булды, интро, видеолар ясау, яңа программа, костюмнар. Бераз сөйләүне дә киметергә уйладым әле. Концертта патриотизмга багышланган өлеш булачак. Татарның күркәм гадәтен саклап, Нурлатта тамашачыларны бушка чәй белән сыйларга булдым. Концертларга МХОда катнашкан, вафат булган егетләрнең гаиләләренә дә урыннар, бүләкләр каралган. Концертларымда бу инде гореф-гадәткә әйләнде.  Әлмәт, Яр Чаллы, Түбән Кама, Нурлат, Казан һәм башка район үзәкләренә гастрольләргә чыгарга исәп. Казанда билетларның 70% сатылып беткән икән. Әле бит реклама да куймадык, шуңа күрә тамашачыма да рәхмәт әйтәсем килә. 

– Операциягә керүне белгәч, егетләр дә “абый, без синең белән”, дип, видео яздырып җибәрделәр. МХО зонасыннан бер медаль кайтты әле. Егетләр миңа әйберләр җибәрде: кинжал, авыз гармуны, баян. Безнең ярдәмгә җавапсыз каласылары килми. Барыбыз да исән-сау булыйк.