КФУ метеорологы: Гыйнвардагы мондый салкыннар чирек гасыр күзәтелмәгән иде

Аның мәгълүматлары буенча, гыйнварның беренче тугыз көнендә уртача температура -19,8 градус тәшкил иткән, гәрчә бу чор өчен норма -10 градуска тигез булса да. «Гыйнварның мондый салкыннар белән башлануы күптән күзәтелмәгән иде. Аны 1997, 1989, 1987 елларның шул чоры белән чагыштырырга мөмкин. Алдагы декадада һава температурасы нормадан уртача 8 градуска түбәнрәк булыр дип көтелә», - диде ул.

 

11 гыйнварда бераз җылытачак һәм һава температурасы -13 градус тәшкил итәчәк, җомга көнне 16 градус салкын булуы көтелә, дип яза Татар-информ.

 

«Әмма бу озак дәвам итмәячәк һәм ял көннәрендә янә суытачак. Шимбәдә һава температурасы -22 градус, якшәмбедә -19 градус тәшкил итәчәк», - диде ул.

 

Әүһәдиев искәрткәнчә, салкыннардан тыш явым-төшем буенча да аномалия күзәтелә. Беренче декадада кар катламының биеклеге, нормадан 8 сантиметрга узып, 39 сантиметрга җиткән.