07.12.2023 Җәмгыять

Луиза белән Марат 25 455 863 50 сумны банкка кайтарырга тиеш

Салават шәһәрендә 25 миллион сум акча урлап даны таралган экс-кассир Луиза Хәйруллина берничә ай элек иреккә чыккан. Ул 4,5 ел колониядә утырды. Бу хакта Луизаның туганнарына сылтанып, UFA1.RU порталы хәбәр итә. Ире Марат Хәйруллин белән Луиза аралашмый, диелә. Луиза, балаларын алып, ире белән кайчандыр төзегән йортта яши, ди. Туганнары аны эшкә урнашкан, дип сөйләгән.

Миллионнар урлап тотылган ир белән хатын эшенә суд 2021 ел алдыннан нокта куйган иде. Исегезгә төшерәбез, 2017 елның августыннан 2019 елның маена кадәр банкның өлкән кассиры Луиза Хәйруллина ире кушуы буенча системалы рәвештә акча урлаган. Акчаларны үзләштерүен ул төрле документлар ярдәмендә яшереп килгән. Акчаларны яшерен рәвештә алып чыгып иренә биреп барган. Ә ул аларны төрле спорт вакыйгаларына ставкалар ясап, букмекер контораларында туздырган. Гаепләнүчеләр барлыгы 9 025 270 сум, 140 900 доллар һәм 101 315 евро урлаган. 2019 ел ахырында Марат Хәйруллин, тиздән аларның бу афёрасын ачыкларлар дип, хатыны Луизаны һәм ике баласын ияртеп, качу оештырды. Берничә көн гаилә урманда яшеренгән, соңыннан алар янә Салаватка кайтып, машиналарын гаражда калдырганнар һәм таксида Казанга киткәннәр. Анда аларны полицейскийлар тоткарлады да инде.

Суд Луиза Хәйруллинаны “үзләштерү” маддәсе буенча гаепле дип тапты һәм биш елга ирегеннән мәхрүм итте. Марат Хәйруллин бу җинаятьне оештыручы итеп табылды, аны алты елга ирегеннән мәхрүм иттеләр. Суд шулай ук “Россельхозбанк” акционерлык җәмгыятенең 25 455 863 50 сум күләмдәге зыянны каплату турындагы дәгъвасын канәгатьләндерде. Луиза белән Марат бу сумманы уртага бүлеп, аны тулысынча банкка кайтарырга тиеш.

Фото: bashinform.ru

Әлфия ШАКИРҖАНОВА
Өмет
№ --- | 07.12.2023