Илмир Төхвәтуллин карьерасын тәмамлавы турында игълан итте

Илмир Төхвәтуллин белән Радик Сәлахов, тугызынчы җиңүләрен яулап, Раил урынын алдылар. Татарстан чемпионатларында җиңү яулаган иң титуллы көрәшчеләр булу өчен алдагы елларда нәкъ менә шул өч көрәшче арасында көрәш барыр иде кебек тә... Илмир Төхвәтуллин, барысын да гаҗәпләндереп, рәсми ярышларда көрәшче карьерасын туктатуы турында хәбәр итте. Чираттагы җиңүен яулаганнан соң, без аны келәм уртасына чыгарып, тамашачыга бу хакта хәбәр иттек. Көрәш сөючеләр, әлбәттә, Илмирга бик көчле алкышлар бүләк итте.

 

Аның турында күпләр тыйнак, кирәгеннән дә артык көрәшче, диләр. Келәм буенча кычкырып, ризасызлык белдереп йөрми, шатлыгыннан эйфориягә бирелми, көндәшенә каршы пычрак алымнар кулланмый. Тыныч кына келәмгә чыга, көндәшенең, хөкемдарның кулын кысып, тыныч кына чыгып та китә. Гадәттә, тыныч кына ота. Ләкин... Оттырып барса, яки көндәше аның ачуын чыгарса, Илмир “зверь”гә әйләнә дә куя. Һәм... җиңгәч тә янә тыныч Илмиргә әверелә.

 

Күп кенә чемпионнар кебек, Илмир балалар һәм яшьләр арасында көрәшеп, чемпион булу бәхетен татымый. Көрәш белән ныклап Түбән Камада укыган чорында Илнар Гәрәев җитәкчелегендә шөгыльләнә. Беренче тапкыр зур келәмгә чыгуын да Түбән Камада Данил Галиев истәлегенә уза торган бәйге белән бәйли. Ә инде көрәш белән шөгыльләнә башлавында әтисе роле зур булуын искәртә: “Спортны бик ярата ул. Минем дә спортка битараф булмавымны аңлап алып, мине кечкенәдән чаңгы шуарга, төрле физик күнегүләр эшләргә өйрәтте”.

 

Казанга күченгәч, Илмир Төхвәтуллин “Ак Барс” Көрәш сараена эләгә. Булат Хәбибрахманов, Вакыйф Дәүләтшин карамагында күнегүләр алып бара. Үзе дә яшьләр белән эшләүдән тартынып тормый. Казанның берничә мәктәбендә шактый еллар балаларга көрәш серләрен төшендерә, шәһәр балаларын милли спорт төребезгә тарта.

 

Илмир Төхвәтуллин Татарстан чемпионатларында 2011 елда, 20 яшендә чыгыш ясый башлый. Көрәшә башлаганда да 80 килолылар арасында бил алыша ул, аннан соң күп еллар үлчәү категориясен артык үзгәртми, гел шул 80, 85, 90 килограммга кадәрге авырлыкларда. Ике ел рәттән бронза медаль белән канәгатьләнгәч (икесендә дә аның авырлыгында Ринат Хәйретдинов чемпион кала), ниһаять, 2013 елда Илмирга да бәхет елмая. 2023 елга кадәр нибары 2016 һәм 2020 елларда гына җиңүчеләр арасына керми ул. 2019 елда дөнья чемпионатына әзерләнгәндә аягын сындыра ул, күпләр Төхвәтуллин келәмгә әйләнеп кайта алмас дип өметләнсәләр дә, өметләрен акламый Илмир. Кайта, җиңүләр сериясен дәвам итә. Инде китәргә вакыт җитте дип белдерде ул. Хәер, көрәштән китмәячәге көн кебек ачык Илмирның. Инде бүген үк берничә урында тренерлык итә ул.

 

Ә без исә Илмир Төхвәтуллинга матур көрәше, матур җиңүләре, матур алымнары өчен рәхмәт җиткерәбез. Киләчәктә шәхси тормышында да, тренерлык эшчәнлегендә дә уңышлар теләп калабыз!