18.10.2023 Җәмгыять

Лотерея отып миллионер булган хатынны җирләргә күршеләреннән бурычка акча җыйганнар

Исегездәме, 2001 елда эшсез Надежда Мөхәммәтҗанова «Бинго-шоу»да җиңеп, бер мизгелдә миллионерга әйләнгән иде. Ә үлгәч... күмергә дә акчасы булмаган. Лотерея билетын ул сдачага алган. Аңа 29 миллион сумлык джекпот эләгә (ул вакытта якынча миллион доллар). Хатын һәм аның ире өстенә төшкән "җилдән килгән" акча аларның тормышын челпәрәмә китерде.

Уфа читендә яшәүче яңа миллионерлар "тыныч алкоголиклар" дип аталган. Мөхәммәтҗановлар, җиңү турында белгәч, бу эшне билгеләп үтәргә ашыга, һәм бу берничә елга сузыла.

Матбугат чаралары язганча, урындагы властьлар Мөхәммәтҗанова кибеткә йөргәндә аны таламасыннар өчен участок инспекторы билгели. Миллионерлар фатирында тәүлек әйләнәсе сак урнаштырганнар.

Кинәт кенә баеп киткән гаилә акчаны теләгән һәркемгә өләшә, аларга ерак туганнары һәм гади хәерчеләр тартыла. Надежда беркемгә дә баш тартмый.

Җиңүченең акчаны ничек сарыф итүен белгәч, «Бинго-шоу» хакимияте дә миллионерларны коткарырга тырыша: аңа финанс директоры бирә. Гаилә өч бүлмәле яңа фатир ала, ике улына да фатирлар һәм машиналар сатып алына.

Әмма ир белән хатын үз гадәтен һәм яшәү рәвешен үзгәртмәгән. Яңа фатирда җиһазлар юк, миллионерлар пычрак матрасларда йоклый, тәмәке төпчекләрен идәнгә сүндерәләр. Үзләренең тәртипсезлеге аркасында ир белән хатын яңа торакта янгын чыгаралар, аны Надежда чәшке туннары белән сүндерергә тырыша…

Миллионлы җиңү иясе аны алганнан соң нибары биш ел гына яшәгән. Надежда табибларга мөрәҗәгать итми, һәм аны дәваларга соң була. Бу вакытта элекке байлыгыннан бернәрсә дә калмаган, һәм Надежда тулы фәкыйрьлектә үлгән. Аны иң арзан тариф буенча күмгәннәр, күршеләреннән бурычка акча җыйганнар. Элекке миллионерны җирләүгә бер генә туганы да килмәгән...

Кызыл таң

Фото: Татар-информ

Автор:Резеда Галикәева

---
Матбугат.ру
№ --- | 18.10.2023