Йорты янган 81 яшьлек әби: “Монысын да күрергә язган икән”

Моңарчы кибеттән кайтып барганда машина бәрдергән булган. Сынаулар аның белән генә бетмәгән икән әле. Узган атнада Фәрхинур әбинең өе янган. Йорты яшәрлек хәлдә түгел, ремонт кирәк.

 

–  Миңа монысын да күрергә язган икән инде, дип уфтана Фәрхинур әби. Сабыр ул, борчуын күрсәтмәскә тырыша. Елап та булмый, хәзер инде күздән яшь тә чыкмый, ди үзе. Документларын гына алып чыга алган, өендә бөтен әйбере дә янып бетте. Кызы башка авылда яши, тик әби, үземнең авылдан китәсе килми, ди. Әлегә бездә яшәп тора, – ди күршесе Марзия ханым. 

 

Янгын иртәнге алтылар тирәсендә чыккан. Уянса да, алты тулганчы дип бераз ятып торырга булган. Күрше бүлмәдә ниндидер черт-черт иткән тавыш ишетеп, чыгып караса, морозильнигы дөрләп яна ди. Башта чиләк белән су алып кереп, үзе сүндереп караган. Ничек үзен ток тотмаган, ди күршесе. 

Янгын сүндерү машиналары тиз килеп җиткәнлектән, өйнең түбәсе, стеналары калган. 

 

–  Йортның эченә ремонт ясап, янгын чыккан бүлмәнең түбәсен, стеналарын алыштырырга кирәк. Халыктан ярдәм килә башлады, Аллаһның рәхмәте яусын! Фәрхинур әбигә ничек тә булышасы иде. Гомер буе яшәгән нигезеннән китәсе килми аның, бергәләшеп йортын яшәрлек хәлгә китерә алсак иде, – ди Марзия ханым. 

 

Ярдәм итәргә теләүчеләргә: сбербанк  +7 917 908-40-67 номерына беркетелгән. Марзия Ракиповна Гибадуллина.