25.07.2023 Мәдәният

Бүген Мирсәет Сөнгатуллин 70 яшьлек юбилеен билгели (ФОТО)

25 июльдә Татарстанның халык, Россиянең атказанган артисты Мирсәет Миншаһит улы Сөнгатуллинга 70 яшь тулды! Аны күркәм юбилее белән тәбрик итәбез, аңа исәнлек-саулык, озын гомер, имин тормыш, иҗади уңышлар телибез.

Мирсәет Сөнгатуллин иҗади эшчәнлеген 1976 елда Г.Тукай исемендәге Татар дәүләт филармониясендә – Татар дәүләт җыр һәм бию ансамбле хорында башлый. Бер елдан соң Казан дәүләт консерваториясенә (вокал бүлегенә) укырга керә. Студент елларында ук ул күренекле җырчылар – Илһам Шакиров, Әлфия Авзалова концерт бригаларында Татарстан төбәкләрендә чыгыш ясый.

Консерваторияне тәмамлагач, ул Г.Тукай исемендәге Татар дәүләт филармониясенең әдәби-музыкаль лекторий бүлегендә эшли (1984-1987 еллар). Аннары гаилә хәленә бәйле рәвештә, 1987 елда аңа Мәскәүгә китәргә туры килә. Музыкант Рифкать Сәйфетдинов белән «Бәйрәм» ансамбле оештыра. Анда Равил Харисов белән бергә җырлый. Эстрада һәм татар халык җырларын башкаралар. Ансамбль Советлар Союзында һәм чит илләрдә татарлар яшәгән төбәкләрдә бик тиз популярлаша. Ул татар җыр сәнгатен Латвия, Литва, Украина шәһәрләрендә, Россия шәһәрләрендә (Екатеринбург, Төмән һ.б.) яшәүче милләттәшләребезгә җиткерә.

Җырчы 1989 елда Казанга кайта һәм Муса Җәлил исемендәге Татар дәүләт опера һәм балет театрында эшли башлый, аннары «Казан» милли-мәдәни үзәгенә күчә.

М.Сөнгатуллин гомере буе татар халык җырларын, татар композиторларының әсәрләрен башкара, ул әле дә онытылган татар халык җырларын эзләү, аларны дөньяга чыгару юнәлешендә эшләвен дәвам итә, аның репертуарында «Эскадрон», «Уел», «Тәфтиләү», «Шәле тәрәзәләре», «Әлкием», «Алимәкәй» һ. б. онытыла барган татар халык көйләре дә урын алган. Иҗатында үзе көйгә салган – «Борнаем» (Ф. Сафин сүз.); «Болгар авыллары көе» (Г. Зәйнашева сүз.); «Кыязлым» (Г. Әдхәмова сүз.); «Бизнәм» (Ш. Жиһангирова сүз.); «Чиябаш авылы көе» (Р. Корбан сүз.); «Кама Исмәгыйль авылы көе» (Н.Әхмәдиев сүз.); «Аерма син Ходай» (Ә.Зарипов сүз.), «Өзгәләнде яшь сандугач» (Р. Миңнуллин сүз.); «Туган як» ( Б. Рәхимова сүз.) һ.б. популяр җырлар да бар.

2016 елда күренекле җырчы 205 татар халык җырлары һәм мөнәҗәтләре сыйган диск чыгара. Анда кергән әсәрләр 14 сәгатькә якын яңгырый. Шул рәвешле күренекле җырчы иң күп санда татар халык җырларын дискта яздырып, рекордчы булды: аның исеме җыр сәнгатендә куйган олы хезмәтләре өчен Россия һәм Бөтендөнья рекордлар китапларына кертелде.Ул дистә ярым рус халык җырлары туапланган СD диск та чыгара.