Тугыз бала үстерүче Камашевлар: «Гаиләдә һәркем бер якка карарга тиеш»

Лия һәм Алексей Камашевларның киң һәм җылы кочакларында тугыз бала үсә. Иң олы уллары – Лев атлы егеткә 17 яшь булса, иң нәниләре – Семен күптән түгел ике яшен тутырган. Дүрт балага гомер биргән бу күркәм гаилә тагын биш баланы тәрбиягә алган.

 

– Гаиләдә без – 11 кеше. Балаларыбыз – Лев, Илмир, Ислам, Әнвәр, Ралинә, Азалина, Айнур, Елизавета һәм Семен. Моннан 18 ел элек ирем Алексей белән мәңге бергә булырга вәгъдәләшкән чакта гаиләбез зур булыр дип уйлаган идек уйлавын, әмма бу кадәр зур булыр дип күз алдына да китермәдек, – дип елмая Лия ханым.

 

Дөрес, «Идел буе төбәгенең уңышлы гаиләсе» бәйгесендә тагын да зуррак гаиләләр белән танышу бәхете елмайган аларга. Ләкин Камашевлардан да көчлерәк гаилә табылмаган.

 

– Әлеге конкурска без Татарстанда уздырыла торган «Нечкәбил» бәйгесе аша килдек, дисәк, дөресрәк булыр. «Нечкәбил»дә катнашу үзе бер зур сынау, тәҗрибә булды. «Идел буе төбәгенең уңышлы гаиләсе» бәйгесендә катнашырга тәкъдим килеп ирешкәч, озак уйлап тормадык – ризалаштык. Округ күләмендә уздырыла торган бәйге булгач, ул безне тагын да берләштерер, балалар өчен кызыклы тәҗрибә булыр, дигән фикер туды. Һәм ул шулай булды да. Бәйгегә әзерләнгәндә, без көне буе диярлек бергә булдык, мәдәният йортына барып та, өйдә дә мәш килдек. Кыскасы, бик күңелле булды ул, – дип уртаклашты Лия Камашева.

 

Бәйгедә «Гаилә визиткасы», «Иҗади номер», «Викторина» һәм «Төбәк турында сөйләү» кебек этапларны узган алар. Берсеннән-берсе сәләтле балалар тәрбияләүче гаиләгә җиңү әллә ни авыр бирелмәгән. Уллары Илмир оста итеп баянда уйный, Әнвәр матур итеп шигырьләр сөйли икән. Олы уллары Лев – программист, Ралинә белән Лизага тимераякта шууда, ә Исламга йөгерештә тиңнәр юк. Аларның «гаилә палитрасы»на оста куллы Азалина белән Айнур ямь өстәп тора.

 

– Дөресен генә әйткәндә, бәйгедә җиңәрбез дип уйламаган идек. Башкаларның иҗади чыгышларын күреп, бераз күңелсез дә булып алган иде. Әмма жюри нәкъ менә безнең чыгышларның үзенчәлеген тоеп алган, күрәсең. Алар бит башкаларныкына һич тә охшамаган иде. Аларның видеоязмаларын Чабаксардан кайткач та кат-кат карыйм. Балалар булдырдылар. Кызык-кызык мизгелләр булса да, алдан уйланганча килеп чыкты, – дип уртаклашты әңгәмәдәшебез.

 

Әлеге җиңүнең әһәмияте турында кызыксынабыз.

 

– Беренче чиратта, бу җиңү безнең гаиләнең бердәм булуын һәм бергә чакта барысын да булдыра алуыбызны раслады. Уңыш сере, дисезме? Менә шул бердәмлектәдер, мөгаен. Гаиләдә һәркем бер якка карарга тиеш бит ул, – дип җавап бирде Лия ханым.

 

Камашевлар гаиләсен җырлап-биеп кенә ята дип уйлый күрмәгез тагын. Эш арасындагы шөгыль генә алары. Әле берничә ел элек башкалада яшәгән бу гаилә Биектау районының Усад авылына кайтып төпләнә.

 

– Кечкенә генә хуҗалыгыбыз бар. Ике ат, кәҗәләр, тавык һәм үрдәкләр асрыйбыз. Өйдә дә зоопарк кебек: биш песиебез, тутый кош (попугай) һәм ташбакабыз бар. Йортыбызны приюттан алып кайткан этләр саклый. Һәркемгә – берәр җан иясе, диярсең (көлә). Кызык тоелса да, дөресе шул инде аның. Олысының да, кечесенең дә – үз вазыйфасы. Кемдер абзарда эшли, кемдер – өйдә. Хәзер балаларны өйрәтеп торасы юк: барын да үзләре беләләр, – дип, йортларындагы тәртипләр белән таныштыра хуҗабикә.

 

Балалары хезмәт белән тәрбияләнә аларның. Үзләренә генә хас гаилә кагыйдәләрен дә истән чыгармыйлар.

 

– Безнең йорттагы төп кагыйдә: «Кешеләрдән сиңа карата нинди мөгамәлә көтәсең, үзең дә аларга шундый мөгамәләдә  бул». Тормышның теләсә кайсы өлкәсенә бара торган алтын сүзләр бу. Һәм, әлбәттә, барыңа да бер өстәл янында җыелышырга да кирәк, – дип йомгаклады сүзен Лия ханым.