Татар радиосы рекламаларына пародия

Коточкыч бәйрәм

Хөрмәтле тамашачылар! Татарстанда тиздән зур бәйрәм. Татарстан өчен генә түгел, бөтен татар халкы өчен зур бәйрәм булачак. Мондый бәйрәмнең әле Җир шарында булганы юк. Грандиоз бәйрәм! Коточкыч гүзәл бәйрәм. Ул бәйрәмне күрми кала күрмәгез. Күрми калсагыз, бәхетсез булачаксыз. Тиздән, тиздән, тиздән!.. «УНИКС» залына үзенең коточкыч бөек бәйрәменә затлы бакчаларда затлы куакларга гына кунып сайраучы сандугачыбыз Гүзәл Уразова чакыра. Килми калмагыз!!! Тамаша залына Салават үзе кереп чыгачак. Күрми калмагыз!!!

Атылган йолдыз

Хөрмәтле җыр сөюче милләттәшләребез! Күк йөзендә Галактикалар бихисап. Ул Галактикаларда миллиардлаган йолдызлыклар. Йолдызлыкларда миллиардлаган йолдызлар. Ләкин барысыннан яктырак янучы бер йолдыз бар. Ул күк йөзен генә түгел, безнең күңелләребезне дә яктырта. Ул йолдызның исеме – Салават Миңнеханов. Тиздән ул Кояш галактикасыннан атылып, икенче Галактикага күчәчәк. Күреп калырга ашыгыгыз. Бары тик бер генә көн – 17сендә «Пирамида»да ул яктырып алачак. Ул көнне Салаватның адашы үзе «Пирамида» ишеген ачып караячак.

Сез таныган йолдыз

Кешелек дөньясы затлы аргамак булып, ашкынып киләчәккә чаба. Бу заман ыгы-зыгысы, мең мәшәкатьләр арасында дөньяның үрдән үргә сикереп киләчәккә томырылганын да күрми калабыз. Азга гына тукталып, кайгы-хәсрәтләрегезне күршеләрегезгә калдырып торып, Филармониянең тамаша залына керегез. Сәхнәгә карагыз! Күрәсезме, анда кем балкып тора?! Әлбәттә, сез аны таныйсыз. Ул сезнең яраткан сөекле, сөйкемле, гүзәлләрдән-гүзәл җырчы йолдызыбыз Гөлнара Тимерҗанова! 21ендә аны күреп тыңлау бәхетенә ирешергә язсын. Онытмагыз – 21ендә! Филармония залында! Бәйрәм өстенә бәйрәм – концерт башланыр алдыннан Салават машинасы белән урамнан узып китәчәк.

Изге догада...

Бисмиллаһи рахмани рахим. Безнең бөтен эшләребез, кылган гамәлләребез бисмилладан башлана. Эстрада кояшы Илнар Сәйфиевнең бисмилласы да, амины да җыр. Аның һәр җыры дога булып безнең күңелләребезгә иңә, җаныбызга сеңә. Аны тыңлагач, йөзебезне кыйблага юнәлтеп, сәҗдәгә китәсе килә. Килегез 30ында... шунда, сез кылмаган гөнаһларыгыздан арынып, чистарынып китәрсез. Әгузе билләһи минаш- шайтанир-раҗим. Бу – Салаватның еш кабатлый торган аяте. Бәлки, әле анда Салават үзе дә күренеп китәр.