09.06.2023 Җәмгыять

Үги әни булу җиңелме?

Үги әти-әни дигәч, үзеннән-үзе сагаю барлыкка килә. Чынлап та, кеше баласын үзеңнеке итеп яратырга мөмкинме? Актаныш районының Киров авылында яшәүче Сабитовлар тәрбиягә ун бала алган. Моңа өстәп өч балалары үзләренеке. “Үзеңнекеләр” һәм “үгиләр”гә бүлмичә, бу малай-кызларны ничек үстерергә? Шул хакта әни кеше — Венера Рәис кызы белән сөйләштем.

— Үзегез әнисез, әтисез үскәнгә, тәрбиягә бала алырга булдыгызмы?

— Кечкенәдән күп балалы әни буласым килде. Алай гына да түгел, ул балаларны тәрбиягә алам дип хыялландым. Газеталарда ятимнәр турындагы мәкаләләрне укыганда, караучысы юк, бала алырга теләгән кеше юкмы, дигән җөмләне эзләдем.

Тамчы тама-тама боз тишә, ди бит: бала алырга иремне күндердем. Үзебезнең фамилияне бирәбез, дип сөйләштек. Яшел Үзән районының Норлат балалар йортында яшәүче бертуганнар — Руслан белән Алинә турында ишеттек. Документлар тутырдык. Беренче очрашу гел истә: балалар йортына килгәч тә, сабыйларга уенчыклар, тәм-том тараттым. Ә берничә бала безгә ияреп, директор бүлмәсенә керде. Ул да түгел берсе алдыма ук менеп утырды. “Русланмы әллә бу?” — дип сорадым. Директор баш какты...

— 8 баланы тәрбиягә алып үстерү җиңел дигән тәэсир калды...

— Мин җиңел димәдем! Йөз баланы тезеп бастырсалар да, шулар арасыннан ятимнәрне танырга мөмкин. Нинди генә затлы киемнән булсалар да... Аларның карашы бүтән төрле, чөнки күңелләре китек. Син аларга йөрәгеңне ярып учларына сал, барыбер күңелләрен тулысынча тутыра алмыйсың. Моны башына төшкән кеше генә аңлый...

Руфия РӘХМӘТУЛЛИНА
Ирек мәйданы
№ --- | 09.06.2023