«Татар сүзе» бәйгесенә гаризалар кабул итү дәвам итә

«ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү тәмамланырга бик аз вакыт калып бара. Катнашып калырга ашыгыгыз. Конкурсның премиаль фонды шактый саллы - 1000 000 сум.

Әлеге бәйге республикабызда өченче ел үткәрелеп килә. Ул татар телен һәм әдәби мирасыбызны пропагандалау, үстерү һәм саклау; татар классик язучыларының әсәрләрен популярлаштыру, татар әдәбиятына һәм мәдәниятенә кызыксыну уяту максатыннан үткәрелә.

Конкурс дөньяның барлык тарафларына сибелеп яшәүче бөтен татар халкында зур кызыксыну уятты. Узган ел конкурска 4 меңгә якын гариза килде. Бу күрсәткеч катнашучыларның халык тарафыннан татар сәнгатенә булган ихтыяҗны, аның милли әдәбиятыбызны ихлас яратуын тагын бер кат дәлилли.

Чыгышлар проза һәм шигърият номинацияләрендә бәяләнәчәк. Конкурста катнашу өчен видео форматындагы эшне һәм анкетаны ике дәүләт телендә tnvtatarsuze@mail.ru рәсми почтасына җибәрергә кирәк. Сезнең күп санлы сорауларыгыз буенча гаризалар кабул итүгә WhatsApp номеры да төзедек. Хәзер эшләрегезне 8(917)391-07-87 WhatsApp номерына да юллый аласыз. Әлеге телефон номеры сезнең барлык сорауларыгызга да җавап бирергә әзер. Гаризалар 2022 елның 31 октябренә кадәр кабул ителә.

Катнашучылар түбәндәге яшь категорияләрендә бәяләнәчәк:
- 10 яшькә кадәр булган катнашучылар;
- 11 яшьтән 17 яшькә кадәр;
- 18 һәм аннан өлкәнрәкләр;
- профессионаллар;
- үз шигырен, әсәрен сөйләүчеләр;

Мәртәбәле жюри арасында халкыбызның танылган язучылары шагыйрьләре, артистлары урын алды: Ркаил Зәйдулла, Разил Вәлиев, Ирек Хафизов, Луара Шакирҗан, Рамил Төхвәтуллин, Искәндәр Гыйләҗев, Гүзәл Сәгыйтова.

Бәйгене Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Татарстан - Яңа Гасыр» телерадиокомпаниясе оештыра.

Милләтебезнең бөтен ямен, аһаңен җиткерә алучы мондый чарадан читтә калмагыз. Катнашырга өлгерегез!

Тулырак мәгълүмат shayantv.ru сайтында.