Камил Ногаев: “Татар телен саклау буенча эшне Казанда алып бару, башка район-шәһәрләргә караганда, катлаулырак”

Казанда «Хәрәкәттә – бәрәкәт», «Сөйлә!» проектларының йомгаклау чарасы үтте. Проектлар Казан Мэриясе тарафыннан 2022нче елның февраль-май айларында Татарстан Республикасы Президенты каршындагы Татар телен саклау һәм үстерү мәсьәләләре комиссиясе ярдәме белән тормышка ашырылды. Казанның 40 мәктәбендә 32 остаз 700гә якын укучыны татар биюе хәрәкәтләренә һәм сөйләм осталыгына өйрәтте.

Чарада Татарстан Республикасы Президенты каршындагы Татар телен саклау һәм үстерү мәсьәләләре комиссиясе әгъзасы, Татарстан Республикасы Дәүләт Советының Бюджет, салымнар һәм финанс комитеты рәисе урынбасары Камил Ногаев, Казан шәһәре Башкарма комитеты җитәкчесе урынбасары Гүзәл Сәгыйтова катнашты.

«Шундый матур, зур проектны башкарып чыгуыгыз өчен зур рәхмәт. Татар телен саклау буенча эшне Казанда алып бару, башка район-шәһәрләргә караганда, катлаулырак. Шуңа күрә барыбыз да телне саклауда һәм үстерүдә кулыннан килгәнчә тырышырга тиеш», – диде Камил Ногаев.

Чарада шушы 20 дәрес эчендә өйрәтелгән эш нәтиҗәләре күрсәтелде. Бер сәхнәдә ике сәнгать төре: хореография һәм нәфис сүз очрашты. Укучылар татар биюләрен, вальс башкарды, татар язучылары, шагыйрьләре әсәрләрен сәнгатьле итеп укыды, театтральләштерелгән тамаша күрсәтте.

«Идеяләреңнең тормышка ашуын күрү – зур бәхет. Былтыр май аенда «Хәрәкәттә – бәрәкәт» проектын Казанның парк һәм скверларында башлап җибәргән идек, хәзер ул мәктәпләргә дә үтеп керде. Бүгенге чара – бары тик 20 дәреснең нәтиҗәсе. Киләчәктә аны тагын да масштаблырак, фестиваль итеп дәвам итү мөһим. Проектларның кирәкле эш икәнен һәркем аңлагандыр. Чөнки без хәрәкәтләрне генә түгел, алар аша сөйләм теленә дә өйрәтәбез», – диде Гүзәл Сәгыйтова.

«Хәрәкәттә – бәрәкәт» һәм «Сөйлә!» проектлары остазларына Казан шәһәре Башкарма комитетының рәхмәт хатлары тапшырылды. «Хәрәкәттә – бәрәкәт» дәресләрен профессиональ биючеләр, укытучы-хореографлар татар телендә уздырды.

«Укучылар белән бөтен көчебезне, җан җылысын биреп эшләдек. Төркемемдә рус балалары күбрәк иде, аларга татар хәрәкәтләрен тәрҗемә итеп аңлаттым. Хәтта алар да «Киләсе елга да татар биюе дәресләре булачакмы?», – дип сорый. Проектның гомере озын булсын иде», – ди Татарстанның атказанган артисты, «Хәрәкәттә – бәрәкәт» проекты остазы Алгиз Фәйзуллин.

«Сөйлә!» проектында сөйләм осталыгы буенча мастер-классларны театр артистлары һәм телевидение алып баручылары татар телендә үткәрде.

«Мәктәпләргә сәнгать белгечләре, актерларны җәлеп итү кирәк дигән уем бар иде. Бу проект минем уйларымны тормышка ашырды. Балалар өчен бик кирәкле дәресләр булды: без бер дә сәхнәгә чыгып карамаган балаларны кузгаттык. Шушы «десант» киләчәктә тагын да күбрәк мәктәпләргә җибәрелсә иде. Чөнки укучыларга гадәттә мәктәпләрдә үзләренә генә шөгыльләнергә туры килә», – диде Татарстанның халык артисты, «Сөйлә!» проекты остазы Зөлфия Вәлиева.

Проектларда катнашкан мәктәпләргә, һәр укучыга Казан шәһәре Мәгариф идарәсенең рәхмәт хатлары тапшырылды.

«Казан Мэриясе шушындый проект оештыруы белән без бик бәхетле. Чөнки укучылар чын сәнгатьнең асылына төшенде», – диде Казан шәһәре Совет районының 20нче гимназия директоры Рәхимә Арсланова.

Казан Башкарма комитететының Тел культурасы өлкәсендә милли сәясәтне гамәлгә ашыру бүлеге мәгълүматларына караганда,  «Хәрәкәттә – бәрәкәт» проекты җәй айларында Казанның паркларында һәм скверларында дәвам итәчәк. Әлеге мастер-классларда теләгән һәр кеше бушлай катнаша ала. Аның беренчесе 26нчы май көнне Кабан күле яр буенда үтәчәк.