Украинадагы махсус операциядә һәлак булган Юрий Лабутин белән хушлаштылар

«Без Юрий Владими­ровичның фидакяр батырлыгы белән горурлана алабыз. Ул батырлык һәм кыюлык үрнәге булып мәңгегә безнең хәтердә сакланып калачак. Бүген без Украинада махсус операцияләрдә катнашучы тәтешлеләрнең язмышын күзәтеп барабыз, әмма мондый фаҗига булыр дип уйламаган да идек. Бу безнең район өчен зур югалту», – диде район башлыгы Рәмис Сафиуллов солдатның ту­ганнарының һәм якын­нарының кайгысын уртаклашып.

 

«Солдатлар һәм офицерлар, алар арасында Татарстан вәкилләре дә бар,   үзләренең хәрби бурычларын батырларча үтиләр, каһарманлык күрсәтәләр. Юрий Лабутинның гомере – Ватанга хезмәт итү үрнәге», – дип бил­ге­ләп үтте «Татарстан Рес­публикасының муниципаль берәмлекләре Советы» ассоциациясе рәисе Әгъзам Гобәйдуллин.

 

Районның хәрби комиссары Фәнис Гарифуллин хәбәр итүенчә, Юрий Лабутин һәлак булганнан соң Батырлык ордены белән бүләкләнәчәк. 

 

Сержант Юрий Лабутин 1988 елның 10 маенда Тә­тештә туган. 9нчы сыйныфка кадәр Тәтештәге 1нче урта мәктәптә укыган, Тәтешнең авыл хуҗалыгы техникумын тәмамлаган. 2006 елда Кораллы көчләр сафларына чакырылган. 2007 елның декабрендә контракт буенча хәрби  хезмәтен башлап җибәргән. 

 

2020 елның 25 июленнән танкка каршы аерым артиллерия ди­визиясендә, идарә батареясында, взвод командиры урынбасары – идарә взводының элемтә бүлеге командиры вазифасында контракт буенча хезмәт иткән.