18.01.2022 Язмыш

“Ир бетмәс, исерек көйләп ятма” (ГЫЙБРӘТ ӨЧЕН)

Бик күп еллар инде балалар бакчасында тәрбияче булып эшлим. Хәтта тиешле эш елларын тутырып, пенсия дә ала башладым. Әмма өйдә утырасы килми, шунлыктан һәркөнне эшкә чыгып китәм. Чөнки өйдә мине берни тотмый. Ирем белән икенче балам — кызым тууга аерылыштык. Әни: “Ир бетмәс, исерек көйләп ятма”, — диде.

Ул көннәрдән соң бик күп сулар акты инде. Улым да, кызым да үсеп җитеп, үз тормышларын кордылар. Иркен фатирда яшәсәм дә, килен белән дә, кияү белән дә торасым килмәде. Шуңа күрә хәзер ялгызым яшим. Балаларга хәлдән килгәнчә булышырга тырышам. Кайвакыт ипотекаларына акча бирәм, оныкларны карыйм. Кайбер көннәрне күңелдә бушлык барлыкка килә. Ямансу булып китә. Соңгы елларда социаль челтәрдә утырырга гадәтләнеп киттем. Күбрәк ялгыз ирләр белән аралашам. Үзләре дә миңа язалар. Ай-һай күп икән алар! Аеруча авылларда. Рәсемнәремне карап, матур сүзләр әйтәләр, кунакка чакыралар.

Ун ел элек правага укыган идем. Узган ел “тимер атлы” да булып куйдым. Чакырган җиргә бар диләр бит. Шуңа күрә өзелеп чакырган яңа танышларым янына чыгам да китәм. Ара ерак дип тормыйм.

Авылда яшәүче ялгыз ирләрнең күбесе әниләре белән гомер итә. Беркая эшләмиләр. Ялгыз карчыкны, ягъни әниләрен караган өчен белешмә рәсмиләштергәннәр. Стаж бара. Киләчәктә пенсия булачак. Ә хәзергә ана кешенең пенсиясе ике кешегә тормыш итәр өчен авыл җирендә бик җитә. Ни әйтсәң дә, яшелчә үзеңнеке... Әле кәҗә дә асрасаң, сөткә дә аптырамыйсың дигән сүз.

Ирнең әнисенә беренче мизгелдән үк ошау бик мөһим. Шуңа күрә тәмле телле булырга кирәк, ә менә авырсынмыйча камыр да куеп җибәрсәң, син инде һәр гаилә хыялланган килен буласың. Өрмәгән җиргә утыртмаячаклар сине. Табигатькә чыгарга да вакыт табыла, шашлык-машлык та була. Мунча да ягачаклар, кич белән түшәк тә әзер.

Минем кебекләр күп дип беләм. Ялгызлар үз парларын эзлиләр, төрле юллар белән табарга тырышалар. Кемдер таба, кемдер юк. Кайберәүләр мине бозыклыкта гаепли. Болар — ир канаты астында яшәүче хатыннар. Алар ялгызлыкның ни икәнен белмиләр...

Исемемне язмыйм.

---
Татарстан яшьләре
№ --- | 18.01.2022