Балтачта сыер савучылар үзара көч сынашты (ФОТО)

Быел Балтач районында 38нче тапкыр сыер саву осталарының бәйгесе һәм эре мөгезле терлекләрне ясалма орлыкландыру белгечләренең 14нче район конкурсы узды. Бәйгенең беренче өлешендә катнашучылар теоретик сорауларга җаваплар бирделәр. Аннары исә практик өлештә саву аппаратын сүтеп җыю, сыер саву буенча биремнәрне үтәделәр.

Ә эре мөгезле терлекләр үрчетү буенча технологлар ясалма орлыкландыру буенча үз осталыкларын күрсәттеләр.

Чарада район башкарма комитетының беренче урынбасары Илшат Галимуллин, «Элита» баш нәсел хуҗалыгының баш зоотехнигы Фәнил Кәбиров, Татарстан Республикасы Авыл хуҗалыгы һәм азык-төлек министрлыгының авыл хуҗалыгы һәм азык-төлек идарәсе белгечләре, авыл хуҗалыгы предприятиеләренең зоотехниклары катнашты.

Ярыш йомгаклары буенча сыер саву осталары арасында беренче урынны «Дуслык» хуҗалыгыннан Анна Федорова ады. Икенче урында - «Яна тормыш»тан Рәмзия Әсхәдуллина, өченче урында - «Якты юл»дан Раушания Габдрахманова. Эре мөгезле терлекләрне ясалма орлыкландыру операторлары арасында беренче урынны «Татарстан» хуҗалыгыннанРаушан Кәлимуллин, икенче урында - «Труд»тан Римма Кузницова, өченче урында - «Борнак» хуҗалыгыннан Илфак Фәләхетдинов. Барлык җиңүчеләргә һәм катнашучыларга мактау грамоталары һәм кыйммәтле бүләкләр тапшырылды.