20.05.2021 Җәмгыять

Кызым үлем хәлендә дип, еллар буе акча сорашып яткан

АКШның Огайо штатында бер ана, хәйрия акчалары җыяр өчен, еллар буе кызы үлем хәлендә ята дип ялганлаган. Кызын дәвалау өчен Аббул 2018 елда акчалар җыя башлый. Моның өчен ул махсус краундфандинг сайтына мөрәҗәгать итә. Анда хатынга 4,56 мең доллар күчерәләр (якынча 336 мең сум).

Шулай ук гаиләгә ярдәм йөзеннән бүләкләр һәм төрле спорт чараларына, күңел ачу паркларына чакыру билетлары җибәреп торганнар.

2 еллап америкалы ханым социаль челтәрләрдә кызының авыруын, дәваханәләргә йөрүләрен сөйләп барган. Публикацияләренең берсендә ана: “Бу кечкенә леди – минем иң яхшы дустым. Аның сәламәтлеге өчен догада булыгыз. Безне алда нәрсә көтәсен белмибез”, – дип яза. Февральдә журналистлар белән әңгәмә вакытында Райлига яшәргә нибары ике ай вакыт калды, ди Аббул.

Вакыт үтү белән аңардан кызының чиренең җитдилеген махсус күпертә дип шикләнә башлыйлар.

Нәтиҗәдә суд материалларына ярашлы, үткәрелгән медицина тикшерүләре кыз баланың чирләвенә дәлилләр тапмый.

Социаль опека органнары һәм округ полициясе хатынны кулга алган һәм кыз баланың әтисе Джейми опекасына тапшырылган. Әле тикшерү эше бара.

Кызганыч, акча кешенең аң-зиһенен шулкадәр томалый, күрәсең, хәтта аналар сәламәт балаларын чирле диюгә бара...

Чыганак: Lenta.ru

Фото: пиксабай

Әлфия ШАКИРҖАНОВА
Өмет
№ --- | 20.05.2021