Ваһапов фестивале яңа йолдызлар кабыза (ВИДЕО)

Ваһапов фестиваленең яшь башкаручылар конкурсын хаклы рәвештә татар эстрадасының иң дәрәҗәле конкурсы дип йөртәләр. Яшьләр монда күренә, үсә, зур сәхнәгә юл ала.

Конкурста “канат чыгарган” лауреатлар арасында — Ришат Төхвәтуллин, Филүс Каһиров, Артур Исламов, Илүсә Хуҗина, Айгөл Сагынбаева, Рөстәм Асаев, Руслан Сәйфетдинов, Сәйдә Мөхәммәтҗанова, Марсель Вәгыйзов, Илнар Миранов, Гөлсирин Абдуллина, Азат Абитов, Рәнис Габбазов һәм башкалар.

2021 елның язында фестиваль янәдән бу конкурсы оештырды — яшьләр аны зур кызыксыну белән кабул итте. Конкурска 112 гариза керде, алар арасында, Татарстаннан кала, Мәскәү, Башкортостан, Түбән Новгород, Оренбург, Екатеренбург, Төмән якларыннан да катнашучылар бар.
Конкурсның 14 апрель көнне узасы II нче турына 79 катнашучы үтте.

Тыңлау форматын катнашучы үз теләге буенча сайлап алырга хокуклы. Читтән тыңлау үтүчеләр видеоязмаларын 12нче апрельдән дә калмыйча жюрига юллый. Урындагы тыңлау сәгать 10.00да Татарстан Халыклар Дуслыгы Йортында түбәндәге адрес буенча үтәчәк: Казан шәһәре, Павлюхин урамы, 57нче йорт. Теркәлү һәм жирәбә сәгать 9.00дән башлана.

Җиңүчеләрне без май аенда гала-концертта күрәчәкбез. II турда катнашучыларның тулы исемлеген vagapovfest.ru сайтының "Яңалыклар" бүлегеннән карагыз.

Конкурсантларга уңышлар телибез!