"ШАЯН ТВ"дагы мультфильмнарда 80нән артык җыр Булат Җиһаншин тавышы белән яңгырый

Менә инде ике ел дәвамында"ШАЯН ТВ" телеканалы эшчәнлегенә балалардан кала, олылар да үз өлешләрен теләп кертә. Алар арасында телеканал белән тыгыз элемтәдә торучыларның берсе – Булат Җиһаншин. Шушы ике ел эчендә "ШАЯН ТВ"дагы мультфильмнарда 80нән артык җыр Булат Җиһаншин тавышы белән яңгырый.

Тапшырулардан "Әкәмәтләр дөньясы", "Тук белән Шук", мультфильмнардан "Ялт һәм батыр машиналар", "Төш сакчылары", "Макс Грин", "Минифорс", "Супер Зак", "Сәяхәтче Випо", "Нильс һәм аның дуслары" һәм башкаларда Булат Җиһаншин җырлавын ишетеп була.

“Улыма да, "ШАЯН"га да 2 яшь. Бу дөньяга алар бергә тудылар дисәң дә була. Шуңа күрә миңа бу телеканал бик якын. Монда эшләүчеләр бик тырыш, үз эшләрен яратып эшлиләр. Чит ил тапшыруларын, мультфильмнарын тавышландыру - бик ансат түгел ул. Алар чын профессионаллар - үз эшләрен җиткереп эшлиләр. Әле күп кеше аңлап та бетермидер. "ШАЯН ТВ" телеканалы татар телен үстерүдә иң зур роль уйный, чөнки ул балаларыбыз өчен эшли. Мин дә, республикабызда ана телебезне күтәрүгә алып барган эшкә үз өлешемне кертәлүем белән бик бәхетле. Балаларыгыз ана телен онытмавын теләсәгез, көне- төне татар теле яңгырап торырга тиеш. Моның өчен "ШАЯН ТВ" менә дигән ярдәмче", - дип белдерде Булат “Матбугат.ру”га.