Ваһапов фестивале: “Яңа татар җыры” – елның иң зур вакыйгасы

“Узган елда, бик авыр чор булуга карамастан, Аллага шөкер, шактый зур проектларны гамәлгә куйдык. Шундый зур яңгыраш тапкан проектларның берсе – “Яңа татар җыры” конкурсы”, дип белдерде бүген Ваһапов фонды директоры, продюсер Рифат Фәттахов.

Аның сүзләренә караганда, милли җыр сәнгатен яңа сыйфатлы репертуар белән баету максатын күздә тоткан әлеге башлангыч татар иҗатчылары арасында көтелгәнгә караганда да зуррак кызыксыну уятты. Конкурска 347(!) әсәр килде. Шул исәптән - Татарстан, Башкортостан, Россиянең башка төбәкләреннән генә түгел, хәтта чит илләрдән дә (Италия, Швеция һ.б.).

Конкурсның гала-концерты, мәгълүм сәбәбләр аркасында, 2020 елдан 2021 елга күчерелде. Ул 27 февральдә “Пирамида”га билгеләнгән. Программада конкурста җиңеп чыккан яңа җырларны тәкъдим итү каралган.

Рифат Фәттахов барлык тамашачыларны Яңа ел белән тәбрик итә һәм һәрберебезгә исәнлек-иминлек тели. “Яңа елда, барыбыз да исән-сау булып, концерт залларында очрашырга насыйп булсын”, диде Рифат Фәттахов.