Ильяс Халиков: “Татар көрәшчеләре, түбәтәегез кайда?”

Бу көннәрдә Казанда билбау көрәше буенча дөнья чемпионаты узды. Әлеге бәйгедән соң, җырчы Ильяс Халиков күңелендә борчу хисләре уянган. Бу турыда ул үзенең Инстаграм битен тәфсилләп язган:

“Егетләрне котлыйм! Татар егетләренең исемнәре тарихта! Тырыштылар! Горурлык татар милләте өчен! Әмма халкыбызның: "Татар үлсә дә, ул түбәтәен салмаячак!", дигән мәкаль искә төште әле кыргыз, казах егетләренә карагач.

Хөрмәтле көрәшчеләр, кыргызлардан һәм казахлардан үрнәк алырга кирәк! Алар көне буе диярлек үз гореф-гадәтләрен күрсәтеп, милли баш киемнәрен салмадылар! Хәтта судьялары да келәм уртасында үз баш киемен салмады! Ә без, нишлибез?! Тарихлардан килгән, ата-бабайдан калган, сабантуйларның йөзек кашы булган түбәтәй киюне пьедесталга менгәндә булса да, кияргә онытабыз!? Әллә читенсенәбезме?

Хабиб Нурмугамедов үзенең папахасы белән дөнья күләмендә танылды! Мөгаен, минем белән килешүчеләр дә, мине инкарь итүчеләр дә табылыр! Әмма мин татар баласы, үземнең татар милләтемнән икәнемне, халкым беләнн горурлану хисен югалтырга тиеш түгел!”, дип язып чыкты Ильяс Халиков үзенең Истаграм битендә.