Төркиядә вафат булган Данияр Мөхитов турында якыннары: «Андый кеше бүтән юк»

– Бөтен коллектив шок хәлендә. Әле дә күңел ышанмый. Данияр Җәмилович кебек башка кеше юктыр ул. Тырыш җитәкче, коллективны әйдәп баручы кеше иде. Гаиләсендә дә үрнәк булды. Эчмәде, тартмады. Хатыны белән матур яшәделәр. Ике ул үстерәләр иде. Берсенә – 9, икенчесенә 6 яшь, – дип сөйли Азнакай коррекция мәктәбенең директор урынбасары Альбина Солтанова. – Ул һәркемгә җылы сүзен таба белде. Өлкәннәрне дә хөрмәт итте, кечеләрне дә яратты. Быел бөтен ветераннарны үзе йөреп чыкты. Директор мин дип тормады – укытыр иде, урамга хуҗалык эшләрен дә эшләргә чыгып китәр иде. Ишегалдына кадәр себерде. Ялга киткәнче теплицада эшләп йөрде. Үз гомерендә беренче тапкыр уку елы дәверендә ял алды. Күрәчәге йөрткәндер инде…

 

Данияр Мөхитовны әлеге мәктәптә баласы укыган һәр ата-ана хөрмәт иткән. Алар да сөйләгәндә күз яшенә тыгыла.

 

– Бу мәктәпкә биш ел элек килдек. Нишләргә белмибез, баланы монда җибәргәч югалып калдык. Директор безне каршы алып, барысын да аңлатты. Мин җитәкче дип тормый иде. Гади булды. Бар йөрәген балаларга бирә иде. Ә безнекеләр башкаларга ошамаган бит. Шуңа да әле дә улыма берни әйтмәдем. Баламның йөрәген бозасым килми. Барлык әти-әниләр дә кайгыда. Безнең өчен зур югалту бу, – ди улы биредә укучы Наилә Вәлиева.

 

Данияр Мөхитов Азнакайга күчкәнче, Кәкре Елга авылында эшләгән. Биредә бергә эшләгән укытучылар да аның юклыгына ышанмый.

– Аны безгә җибәрделәр. Тарих укытучысы булып килде, аннары завуч иттеләр, озакламый директор булды. Тәвәккәл, тырыш икәнен тиз күреп алдылар. Бик кешелекле иде. Балаларны мәктәптән җибәрү ягын карамады. Язмышларын уйлый иде. Имин булмаган гаиләләрдә үсүчеләр белән дә уртак телне тиз тапты. Һәркемнең хәленә керә иде. Кызганыч, гомере кыска булды, – ди Азнакай районының Кәкре Елга урта мәктәбенең башлангыч сыйныф укытучысы Лениза Гарифуллина.

 

Данияр Мөхитовны алыштырган директор Илнур Иммаметдинов аңа бик рәхмәтле икәнен әйтә.

– Бергә эшли алмасак та, ул мине ташламады. Мәктәп эшләре буенча нинди генә сорау туса да, Даниярга мөрәҗәгать иттем. Беркайчан юк димәде. Гел булышып торды. Рәхәт эшләдек. Гаиләсенә сабырлык телим, – ди ул.

 

“Маяк” газетасы редакторы Фәрхәт Шәйхуллов белән Данияр Мөхитов якын дуслар, курсташлар булганнар.

 

– Ике көн гел бер уй белән яшим. Данияр исемнән чыкмый. Бик үкенечле үлем булды. Ул мәктәптә укыганда ук мәдәни чараларда катнашты. Институтта да актив булды. Бик матур итеп балалайка да уйный, оста биюче иде. Аның хакында ни генә әйтсәң дә аз булыр. Үз артыннан матур эзләр калдырган кеше ул, – ди Фәрхәт әфәнде.

 

Иртәгә иртән Төркиядән хатыны, кичке якка Данияр Җәмиловичның гәүдәсе кайтачак. Аны туган авылы Татшуганда җирләячәкләр.