Әлфия Авзалова кызы Зөлфия белән ИлГәрәйне нәрсә бәйли?

Бервакыт җырчы ИлГәрәй Әлфия Авзалованың кызы Зөлфия ханым белән бәйле вакыйга турында сөйләде. Шул исемә төште дә, ИлГәрәйгә шалтыраттым. Башта хәл-әхвәлләрен сораштым. Күпләрегез беләдер, бу кышта ИлГәрәй әтисен югалтты...

 

- Әти-әни Казанның бер бистәсендә үз йортлары белән яши иде. Әти үлгәннән соң, әнине үзен генә калдырмадык, хәзер бергә яшибез. Әтинең өлгермәгән эшләре калды: мунча төзекләндерү, гаражны җыештыру. Шулар белән шөгыльләнергә исәп. Бакчада да эш җитәрлек. Концертлар тукталды бит инде. Казандагы концертым сентябрьгә күчерелде. Аңлап кабул иткән тамашачыма рәхмәт. Гаиләмдә бар да яхшы, Аллага шөкер. Олы кызым скрипкага йөри иде, хәзер онлайн дәресләр ала. Аерма зур, кыен. Укытучы да аңлатып бетерә алмый, Адилә дә төшенеп бетми. Мин җырчы буларак, кызымны темпка һәм көйне ишетергә өйрәтәм. Ноталарны синтезаторда өйрәнәбез. Кызым дүрт ай гына йөрсә дә, өч композиция өйрәнде, иң кыены скрипкада уйнарга өйрәнү.

 

 

- Минем әнинең әнисе, ягъни әбием Балык Бистәсе районы Чирмешән авылында туган. Кызганыч, әбием бу дөньядан узган елның 5 апрелендә китте. Үлер алдыннан 2-3 атна кала да, аңа кадәр дә Зөлфия апага сәлам җиткерүемне үтенде. Эш шунда, элек студентларны бәрәңге алырга авылларга җибәргәннәр. Зөлфия апа исә безнең авылга кайткан һәм бер ай бездә яшәгән. "Мин аны үз кызым кебек якын иттем. Ул киткәч тә, хатлар алыштык. Гайшә апа, мин сине беркайчан да онытмам, Казанда балаларыңа берәр нәрсә кирәк булса, ярдәм итәрмен, диде", - дип сөйләде әби. Ул хатлар саклангандырмы, белмим. Әбинең теләген үтисе килә, ләкин Зөлфия апа белән һаман очрашып булмый.

 

Эстрадада 17 ел иҗат итсә дә, үткенлек дигән нәрсә юк ИлГәрәйдә. Бигрәк тыйнак үзе. Яңа җырлары чыкса да, тыңлаучы ничек бәяләр икән дип, шуларны радиога да бирергә кыймый. Җырлар дигәннән, соңгы вакытта ИлГәрәйнең репертуары бик үзгәрде. Элек ул дискотека форматындагы җырлар башкарса, хәзер мәгънәле, эчтәлекле җырларга өстенлек бирә. Клиплары да сыйфатлы. Әмма артык тыйнак, шуңа күрә Зөлфия апага шалтыратырга батырчылыгы җитмидер инде. Ә без ул җитешкәнче шалтыраттык!

 

- Менә хәзер син сөйләп биргәч, исемә төште. Ул чакта безне - Марсель Сәлимҗановта укыган студентларны Балык Бистәсенә колхозга җибәрделәр. Авыл өйләрендә өчәр кеше яшәдек. Мине, Гүзәл Гыймадиева һәм Наилә Хәсәншинаны ашханәгә билгеләделәр. Без Гайшә апада яшәдек. Ай буе! Әлбәттә, бер ай эчендә туганлашып беттек. Шундый истәлекле вакыйганы искә төшерүеңә рәхмәт! ИлГәрәй минем белән элемтәгә чыксын иде, мин аңа әнинең китабын бүләк итәрмен.

 

 

- Кушканнар икән, өйдә генә торабыз. Инде ирем белән өч кило авырлык җыйдык. Аннан ничек арынасы булыр? (көлә) Бүген бик саваплы гамәл кылдык, ятимнәр йортында үскән якыннарыбызга азык-төлек илттек. Мин моны әни хакына эшлим. Төшкә дә керми, риза булып ятадыр дип ышанам. Өч атна дәвамында һәр дүшәмбе Инстаграмда туры эфирга чыктым. Нигездә кешеләр әнинең иҗаты белән кызыксына. Гастрольләрдә йөрүләр, кемдә кунып калулар, әнинең балаларга мөнәсәбәте, репертуары турында сорыйлар. Әни - бик гади иде. Концертлар белән авылларга йөргәндә, берәр йортка кунарга кергәч, башта исәнләшеп, хуҗаларның хәлләрен сорый. Аннары "малларыгыз бармы, ничә тавык, казыгыз бар?" дип сорый торган гадәте бар иде. Бик авыл җанлы иде ул...

 

Бу сөйләшү хакында шундук ИлГәрәйгә сөйләдем. Шатлануын күрсәгез! Зөлфия апа белән элемтәгә керергә вәгъдә бирде. Әгәр алай-болай оялып, читенсенеп йөрсә, Зөлфия апага җитәкләп алып барасы булыр, мөгаен. Кыскасы, бу хәлләрнең дәвамын көтегез...