11.02.2020 Шоу-бизнес

"Фердинанд Сәлахов тормышында тагын да катлаулырак сынаулар булган икән..."

«ТНВ» каналыннан Зәмирә Рәҗапованың «Әй язмыш, язмыш…» дигән тапшыруын яратам мин. Узган елның җәендәге бер тапшыруның кунагы минем иң яраткан җырчыларымның берсе – халыкара конкурслар лауреаты, Татарстанның халык артисты Фердинанд Сәлахов иде.

Аны концертларына мин күп йөрдем. Операциягә керер алдыннан оештырган саубуллашу концертында да, җанының соңгы кылы өзеләм дип торганда, сфинкс кебек, кабат куәт җыеп, аякка басып, яңадан халык алдына чыгып җырлаган вакытларында да яшь аралаш чиксез соклану хисләре кичерә идем. Берсендә, түзмәдем, тәнәфес вакытында:

«Апас чишмәләре кебек,

И агыла җыр-моңнар.

Артистларның шат йөзеннән

Безгә дә күчә нурлар.

Сәхнә үзәге Фердинанд,

Янында иптәшләре:

Очып-бөтерелеп бии,

Җырлый татар яшьләре

Скрипка кылларына яшьтән

Кушылып җырлаганга –

Яңгырап тора тавышы

Фердинанд җырлаганда!

Чибәрләрнең чибәре ул,

Уңганнарның уңганы.

Тамашачыны әсирләп

Талпына җырчы җаны.

Җырга булган мәхәббәттән

Хисләрең ургып торсын.

Җырла син, җырла, Фердинанд, –

Син үзең сайрар кошсың!» – дип яздым да, концерт башлангач сәхнәгә менеп, халык алдында укып, үзенә бүләк иттем. Бу – 2005нче елның 10нчы октябре иде…

Ә җәй көне төшерелгән тапшыруны караганда, Фердинанд тормышында тагын да катлаулырак сынаулар булган икән бит, дип, хәйран калып утырдым. Язмышының сикәлтәле, чыдар чигенә китереп җиткергән киртәләре аша үткән чагында аның сөекле хәләл җефете, кадерле уллары, ике яктан да әниләре, Казан-Мәскәү хастаханәләрендәге мәрхәмәтле, кыю йөрәкле, алтын куллы табиблар, җырчының рухи һәм физик көченә ышанган фониаторлар һәм аны бервакытта да ташлап китмәгән ихлас дуслары – болар барысы да бергә кушылып, Фердинандка дәрт һәм дәрман өстәп торганнар. Аның сәхнәдә үзен тотышындагы зәвыклы гадилек, горур тыйнаклык, тамашачыга карата булган эчкерсез ихласлыгы хәзерге заманның «Үзгәреш җиле»нә ияреп, ертык ыштаннар белән сәхнә сасытып, ярты гәүдәләре шәрә килеш, ярты гәүдәләренә берсеннән берсе уздырып ялтыравыклы ука-ташлар ябыштырып, сәхнә буйлап «Паркенсон» биюенә калтырана-калтырана «фанера»га ияреп, җырлау рәвешләре чыгарып, җитмәсә, үзләрен хөрмәт итеп, акча түләп кергән тамашачының хисләрен уятмакчы булып, буталана-буталана беләкләренә чәбәкләп, «ишетмим!» дип кул чабарга мәҗбүр итеп кычкырып йөрүчеләр өчен чын мәгънәсендә сәхнә эталоны булып тора.

Аның иҗат төркемендә булучылар да югары профессиональ дәрәҗәдәге талант әһелләре. Ә инде Фердинанд белән аваздаш булып, иңен иңгә куеп бергә җырлаучы яшь егет Ярамир Низаметдиновны остазының бер сулышыннан, бер карашыннан аңлый торган бертуган энесе диярсең. Алар шулхәтле пар килгәннәр, бар яктан да бер-берсенә тиң.

Фердинанд, иҗат чишмәләрең бервакытта да саекмасын. Киләчәктә дә татар сәхнәсенең йөзек кашы булырга язсын. Афәрин, егетләр!

Диләрә ИЛЬЯСОВА-СӘРВӘРТДИНОВА,

Казан шәһәре, Безнең гәҗит

Фото: соцчелтәрләдән

---
Матбугат.ру
№ --- | 11.02.2020