Парадтан – салютка. Җиңү көнен ничек бәйрәм итәбез? (ПРОГРАММА)

Татарстан Премьер-минис­тры урынбасары Ләйлә Фазлыева әйтүенчә, игътибар берничә көн белән генә чикләнми, әл­бәт­тә. Бөек Ватан сугышында катна­шучыларның торак шартларын яхшырту, диспансеризацияләү кебек эшләр ел дәвамында оештырыла. Шулай ук апрель ахыры – май урталарына кадәр сугыш һәм тыл ветераннары өчен мә­дәният, мәгариф, социаль яклау, яшьләр сәясәте учреждение­лә­рендә, спорт объектларында төр­ле чаралар һәм акцияләр уздырыла.

 

Бәйрәм чаралары, һәр төрле акцияләр артып тора да бит, Бөек Ватан сугышында катнашу­чыларның сафльары гына елдан-ел сирәгәя. 2015 елда республикада 2441 кеше булса, быелгы Җиңү бәйрәмен нибары 834 ветеранга гына каршыларга насыйп булачак. 

 

 

9 Май көнне узачак иң төп чараларның берсе ул, әлбәттә, “Үлемсез полк” акциясе. Казан башкарма комитетының мәдә­ният идарәсе җитәкчесе Азат Абзалов аңлатуынча, “Үлемсез полк” акциясе, узган елгы кебек үк, 2,5 чакрымга сузылган маршрут буенча узачак. Әлеге чарада катнашырга теләге булганнар Карл Маркс һәм Толстой урамнары киселешендә сәгать 13.00дә җыела башлаячак. Ә колонна 15.00дә кузгалачак.

 

Ләйлә Фазлыева әйтүенчә, уз­ган елгы теләк-тәкъдимнәрне ис­кә алып, авыру һәм өлкән яшьтәге кешеләр колоннага өстәмә урыннарда – Ленин бакчасы һәм Черек күл паркы янында кушыла алачаклар. Сораулар була калса, волонтерларга мөрә­җәгать итәргә мөмкин булачак. Биредә шулай ук медицина хез­мәткәрләре дә эшләячәк. Моннан тыш, үзегез белән авыр һәм зур сумкалар алмаска да киңәш иттеләр.

 

6 – 9 май көннәрендә транспорт хәрәкәтендә үзгәрешләр булачак. Шуңа күрә машина йөр­түчеләргә маршрутларын алдан планлаштыру хәерле. 

 

 

Татарстанның хезмәт, халыкны эш белән тәэмин итү һәм социаль яклау министры Эльмира Зарипова әйтүенчә, игътибар бәйрәм көннәрендә генә түгел, ел дәвамында күрсәтелә. Сугыш ветераннары торак белән тәэ­мин ителә, йортлары һәм фатирлары төзекләндерелә. Социаль ярдәм күрсәтелә торган кеше­ләрнең дә 22 проценты аларга туры килә. Картлар йортында 160 сугыш ветераны яши. Авылда яшәүче ялгыз яки балалары шәһәрдә торган сугыш һәм тыл ветераннарына социаль хезмәт бушлай күрсәтелә. Бүген мондый ярдәм алучыларның саны 1343кә җитә. Моннан тыш, инвалидлар өчен социаль-тернәкләндерү үзәк­ләре эшли.

 

Эльмира Зарипова аңлат­кан­ча, Бөек Ватан сугышында катнашучылар һәм инвалидлар 10 мең сум күләмендәге түләүне май пенсияләре белән бергә алачак. Әлеге түләүләргә республикада 1480 кеше өмет итә. Сораулар булса, 279-21-17 телефоны буенча Пенсия фондына мөрәҗәгать итәргә мөмкин.

 

Сәламәтлек саклау минис­тры­ның беренче урынбасары Аль­мир Абашев ветераннарны өйлә­ренә килеп дәвалаучы та­биб­лар, ташламалы дарулар белән тәэмин итү турында сөйләде. 

 

 

Тантаналы чаралар Архангельск һәм Арча зиратларында, Җиңү паркындагы Мәңгелек утка чәчәкләр салу тантанасыннан башланачак

 

10.00 сәгатьтә – Парад

10.00 – 18.00 сәгатьтә – Җиңү паркындагы чаралар 

11.00 – 13.00 сәгатьтә – Меңьеллык мәйданда концерт 

15.00 сәгатьтә – “Үлемсез полк” акциясе 

19.00 сәгатьтә – “Казан-Арена” каршындагы мәйданда бәйрәм концерты

22.00 сәгатьтә – Бәйрәм салюты