01.06.2018 Яңа китаплар

"Үзгәрәк шул хәзер заман..." - Раил Гатауллинның яңа китабы чыкты

Техник фәннәрдә белгеч Раил Гатауллинның беренче генә китабы түгел бу. Моңарчы ул татарча "Информатика" китабын чыгарган иде. Әмма, күпләр белә, Раил әле шигырьләр дә иҗат итә. Яңа чыккан "Иң зур сер" китабында аларны укырга мөмкин. Кайбер әсәрләрен Раил Гатауллин "Матбугат.ру" укучылары белән дә бүлеште.

Туган ягым иртәсе

Таңнарны каршы алырга

Яратам иртәләрен.

Көтәм кояш нурларының

Битемне иркәләвен.

Яратам карап торырга

Табигать җанлануын.

Иртәнге чык тамчысыннан

Чәчәкләр баллануын.

Челтерәп аккан чишмәдә

Кояш нуры уйнавын.

Балыклары йөзеп йөргән

Матур елга буйларын.

Көнбагышлар, баш күтәреп,

Кояшны эзләүләрен.

Йомраннарның, туры басып,

Кырларны күзләүләрен.

Каршы алам көн дә шулай

Таңнарны. Нишләтәсең...

Нык яратам туган якның

Алсу таңлы иртәсен.

Хыяллар

Нинди генә хыяллар юк,

Нинди генә теләкләр.

Хыялларның шундые бар -

Шашып тибә йөрәкләр.

Канатларың чыга үсеп,

Очкычлана күзләрең.

Аңлашылмый дус-ишләргә

Синең әйткән сүзләрең.

Кемдер көлә, кем мыскыллый

Атлаган адымыңны.

Югалткансың, диләр, дустым,

Булган бар акылыңны.

Кире тартып төшерәләр

Бергә баткан сазлыкка.

Бәйләнеп каласың шулай

Сазлыктагы казыкка.

Ә кемнәрдер күкне иңли -

Куркытмыйлар кыялар.

Очып китә алсаң гына

Чынга аша хыяллар.

Ышаныч...

Ышаныч ул килә икән еллар белән,

Кайчагында борма-борма юллар белән.

Егылсам да тотарлар дип күз йомасың

Абынганда ышанычлы уйлар белән.

Ышанычны булмый икән сатып алып,

Ышанычны булмый икән тартып алып.

Чын күңелдән кешеләргә ышанганда

Бер ярдәмсез һичничек тә булмый калып.

Ышанычны бик тиз кайчак югалтуы,

Җитә кала берәрсенең болгатуы.

Югалталар ышанычны кайвакытта

Бу дөньяда дусларның да иң татуы.

Кайтаралар ышанычны азлар гына.

Сынауны да бергә үтә азлар гына.

Ышанычны аклау өчен җитсә иде

Кышлар үтеп җитә калу язлар гына.

Шунсы кыен - бер кешедән күңел кайтса

Башкаларга ышану да була авыр.

Ышанычны бер мизгелдә югалтулар

Гомерлеккә яра булып истә калыр...

"Көчле кешеләр"

Хаклы булып, дәшми кала алсаң -

Көчле кеше, диләр, сокланып.

Хаксыз кешеләргә юл бирдем, дип

Йөрергәме аннан мактанып?!

Кемнәр язган шушы гыйбарәне -

Хаклы кешеләрме, хаксызмы?

Нигә әле өскә күтәрәбез

Мөһим мәсьәләдә хаксызны?!

Гаделсезлек чәчәк ата бара -

"Көчле кешеләр" бит дәшмиләр...

Тый телең, дип бүген күп кешеләр

Хаксызларны тыңлап яшиләр.

Аксакаллар киңәш сорый

Булган шундый заманалар -

Аксакаллар киңәш биргән.

Нинди сорау бирсәң дә син

Аңа җавап таба белгән.

Үзгә хәзер заманасы -

Тормышлар вә сорау үзгә.

Интернетка керә һәркем

Соравына җавап эзләп.

Аксакаллар үзләре үк

Киңәш сорый балалардан -

Бу төймәгә ничек басыйм?

Монысы ничек, әйтче, балам.

Анысын да карап әйтче,

Тегесен дә. Хәтерем яман.

... Аксакаллар киңәш сорый -

Үзгәрәк шул хәзер заман...

---
Матбугат.ру
№ --- | 01.06.2018