10 айлык Динарның яшисе килә!

Чистай шәһәрендә яшәүче 10 айлык Динар Галимовны коткару өчен 20 миллион сум акча кирәк. “Ятсак та, торсак та башта бер генә уй. Ничек итеп акча табарга, дип кайгырабыз. Оны­гыбызны ничек тә аякка бастырасы килә бит”, – ди Динарның әбисе Гөлсинә ханым. Туганнары бу вакыйганы би­г­рәк авыр кичерә. Ник дигәндә, беренче оныклары Айнурны 1 яшь тә 3 айлык чагында югалтканнар.

“Ике ай вакытта башындагы йомшак урыны шешеп чыкты. Ник авырганын  белмә­дек. Ә аннары гемоглобины төште. Башы бик нык авыртты. Айнурның хәле бик авыр иде. Кечкенә сабый авыртуларга ничек түзгән­дер, билгесез. Кая гына йөрт­мәдек. Республика балалар клиник хастаха­нәсендә дә дәвалан­ды. Тик  без аны коткарып кала алмадык”, – дип искә ала Гөлсинә ханым.
 
Айнурны җирләгән чакларын Гөлсинә апа әле дә оныта алмый. “Бер көндә бөтен чәчем агарып чыкты. Икенчесе дә авырый башлагач, бөтенләй күңелсезлеккә бирелдек. Динар өч ай вакытта авырый башлады. Бил­геләре абый­сыныкы кебек иде. Без тизрәк чаң суктык. Баланы генетикка да алып бардык. Динарның авыруларына карап, Айнурның да бәл­лүр авыруыннан үлгәнен белдек. Безгә бит бу хакта табиблар әйт­мәгән иде. Генетиклар ике ба­ла­ның да кан анализларын тик­шергәч, бер үк авырудан интеккән­нәрен әйтте. Айнурның авыруы тиз таралса, Динарныкы озаграк бара. Әнә шуңа да коткарып булмасмы дип өметләнәбез”, – ди әбисе.
 
Динарның сөякләре  рентген сурәтеннән ап-ак булып күренеп тора икән. Бала күрми башлаган. Якыннары әнә шуңа да бик борчыла. Әнисе Лилиягә бик авыр. Беренче баласын югалтканнан соң, ул үзенә юаныч, терәк булыр дип, икенчесен алып кайта. Тик язмышка ни язылганын белеп булмый шул. Баксаң, Лилия белән Дамирның геннары бер үк икән. “Чит ил­ләрдә туганнар өйләнеш­кәннән соң балалар остеопороз авыруы белән туа икән. Ә бит безнекеләр туган түгел”, – дип аптырый Гөлсинә ханым.
 
Динарга чит илдә сөяк җелеген күчереп утыртырга җыеналар. Әлегә Галимовлар әнә шуңа өмет­ләнеп яши. Ә сабыйның хәле җи­ңе­ләйми. Күзләре күрмәү өстенә, ул үсеш ягыннан да калыша. 10 айлык бала әле утырып та тора алмый, ди әбисе. “Безгә “Артемка” дигән фонд  ярдәм итәргә алынды. Үз көчебез белән 6 миллионнан артык акча җыйдык. Тик калганын каян аласы? Мәрхә­мәтле кешеләр булышмасмы дип көтәбез. Вакытыбыз аз калып бара. Оныгымны ничек тә саклап калырга иде бит!”– ди Гөлсинә ханым.
 
Динарга ярдәм йөзеннән татар эстрадасы җырчылары хәй­рия концерты уздыра. Әлеге чарага сез дә өлеш кертә аласыз. Шулай ук Галимовлар гаиләсенә матди ярдәм күрсәтергә дә була. МТС, Билайн, Мегафон, Теле2 һәм Ростелеком операторларыннан 3113 номерына artemka сүзе бе­лән үзегез күчерергә теләгән сумманы язып смс җибәрергә мөм­кин.