Пассажирны коткару өчен Татарстан авиакомпаниясе очкычы мәҗбүри тукталыш ясаган

Симферопольдән Белгородка очучы ЮВТ АЭРО Татарстан авиакомпаниясе очкычы Ростов шәһәрендә мәҗбүри тукталыш ясаган. Сәбәбе - борттагы бер ир кешенең хәле кискен начараю булган. Борпроводник Илсур Ильясов ир-атны күзәтеп торган, дип хәбәр итте "Татар-информ" агентлыгы хәбәрчесенә авиакомпаниянең матбугат секретаре Әлфия Бариева.

Бер мәлдә пассажир кисәк агарып киткән һәм сөйләшә алмый башлаган. Бортпроводник пассажирлар белән элемтәгә кереп, алар арасында табиб булу-булмавы белән кызыксынган. Үзен медицина хезмәткәре дип таныткан хатын-кыз ярдәмгә килгән. Бортпроводник белән икәү алар пассажирны күзәтеп торганнар һәм аңа аңын югалтырга мөмкинлек бирмәгәннәр.

Очкыч командиры Александр Егоров Ростов-на-Дону шәһәрендә мәҗбүри тукталыш ясарга дигән карарга килгән. Диспетчердан рөхсәт алу белән, ул очкычны утырткан. Пассажирның хәле начараюдан башлап, очкыч утырганчыга кадәр, 20 минут вакыт үткән.

Очкыч трапы янында пассажирны реанимация бригадасы көтеп алган һәм аны Ростов-на-Дону хастаханәсенә илткән. Экипажның оператив эш итүе кеше гомерен саклап калырга булышкан.

Әлфия Бариева хәбәр иткәнчә, авиакомпания җитәкчелеге очкыч командиры һәм борпроводникка дөрес гамәлләре һәм карарлары өчен рәхмәтен тапшырган.