"Ишегалды": артистлар реалити-шоуда катнаша! (ФОТО)

"БалМай" иҗади төркеме егетләре Марсель Мәхмүтов һәм Рафил Галимуллин яңа проект өстендә эшли. "Ишегалды" – эстрада артистлары катнашында узачак татарча реалити-шоу, ягъни чынбарлыкка нигезләнгән телевизион тапшыру. Егетләр әйтүенчә, мондый шоу татар дөньясында беренче тапкыр оештырыла.

- Проектның эчтәлеген, катнашучыларын ярты ел буе билгеләдек, уйладык. "Ишегалды" артистларның актерлык осталыгын күрсәтү, чын йөзен ачу максатын күздә тота. Исеменә килгәндә, гадәттә, ишегалдында төрле кызыклы хәлләр, ыгы-зыгылар була. Ишегалдында кеше сөйләшә, аралаша, серләшә, үсә. Бу – уңай фикерле һәм хәтта тәрбияви юнәлештәге шоу. Әлегә 3-4 тапшыру төшерелде. Кайсы телевидениегә бирербез – анысы билгеле түгел, ләкин алырга теләүчеләр бар, – дип сөйләде Intertat.ru хәбәрчесенә Рафил Галимуллин.


 


"Ишегалды" проектында Алсу һәм Азат Фазлыевлар, Салават Миңнеханов, Замирә Рәҗәпова, Газинур Файзуллин, Илшат Исхаков һәм башка популяр җырчылар, алып баручылар катнашыр дип көтелә. "Катнашучыларның барысы да төрле холыклы. Алар үзара сүзгә килергә һәм шул ук вакытта уртак тел табарга да мөмкин. Хәер, тиздән барысын да үз күзләрегез белән күрерсез", – дип белдерде Рафил.