Камил хәзрәтне кая алып китәләр?

 

Инде Болгарга кайтыйк. Былтыр да Пәйгамбәребезнең туган көне уңаеннан үткәрелгән иң колачлы Мәүлид бәйрәме шушында – “Ак мәчет”тә булган иде. Аның үзенчәлеге шунда: быел да барча татар мөфтиятләреннән диярлек кунаклар килде. Елдагыча Тәлгат хәзрәт Таҗетдин җитәкчеле­ген­дәге Русия Үзәк Диния нәзарәте (РҮДН) делегациясе аеруча ишле иде. 

 

Менә Коръән укып, дога кылынды. РИУ шәкертләре, нашид әйтеп, Пәйгамбәребезне зурлагач, сүз ТР Дәүләт Киңәшчесе Минтимер Шәймиевкә бирелде. “Менә тагын Болгарга сөенешеп килдек. Элек-электән шушы изге җиргә килеп, Болгарга баш иеп, кадер-хөрмәт күрсәткәне өчен Тәлгат хәзрәткә Алланың рәхмәте яусын! Болгарга тартылабыз. Әгәр без биредәге изге истә­лекләрне торгызмасак, моңа кем алыныр иде?! Эшләнгән эш­ләребезнең нәтиҗәсе буларак, Болгар ЮНЕСКОның тарихи-мәдәни истәлекләре исемлегенә кертелде. Биредә хәзер кунак­ханә комплексы төзи башладык. 2017 елның җәенә ул файдалануга тапшырылыр дип уйлыйбыз. Монда ял итәргә дә, спорт белән шөгыльләнергә дә мөмкин булачак. Болгарда егермеләп мунча булган. Кунакханә комплексында шуларның берсен торгызырга исәп. Биредә ислам академиясе булачак. Бүген киңәшмәдә аның исемен Болгар Ислам академиясе (БИА) дип тәгаенләдек. Аның проектын карадык. “Ак мәчет”нең кыйбла ягында булачак ул. Киләсе елның май аенда БИАның нигез ташлары салыначак. Анда магис­тратура да, докторантура да булдырылыр, ул ислам дөнья­сының иң алдынгы уку йортларыннан берсенә әйләнер дип өмет­ләнәбез. Барысы да безнең кулда. Тырышсак, бергәләп алынсак, бөтенесен дә булдыра алабыз. Алла боерса, БИАның төзелеп бетеп эшли башлавын да күрербез. Киләчәктә дә күрешеп, киңәш­ләшеп яшәргә язсын! – дип сәламләде анда өммәттәшлә­ребезне Минтимер ага.

 

Татарстан мөфтие Камил хәз­рәт Сәмигуллин мөселманна­рыбызны бәйрәм белән тәбрик иткәннән соң: “Ни кызганыч, Мәү­лид бәйрәмен инкарь итү­челәр дә бар”, – дип әлеге ча­раның сөннәтебезгә туры килүен раслаучы берничә дәлил китерде. Мәсәлән, Пәйгамбәребез дүшәм­б­е көнне ураза тотып, туган көнен билгеләп үтә торган булган икән.

 

Мәскәүдәге РФ Диния нәза­рәте (РФДН) рәисенең беренче урынбасары Дамир хәзрәт Мөхетдинов: “Элек Болгарга җәй көне генә килә идек, хәзер көзен, кышын, язын да – ел әйләнәсе килү мөмкинлеге бар. Болгар җире бик күркәмләнде. Хәзер һәр барган җиребездә, Болгарга барыгыз, дип үзебез дә чакырып торабыз”, – дип татарстанлыларга рәхмәтен җиткерде.

 

Тәлгат хәзрәт Таҗетдин үз чиратында, имамнарыбызга зур вазыйфа йөкләнгән, халыкның әдәп-әхлагын төзәтү юлында ар­мый-талмый эшләргә, бердәм булырга кирәк, дип сөйләде; мөм­кин булган кадәр барча мә­хәл­ләләрдә Мәүлид бәйрәме уздырырга чакырды. Тантана барышында РИУ шәкертләре, җыр­чылар Динар Шәймәрданов, Раяз Фасыйхов, Илгиз Шәйх­разыев касыйдәләр укыды, мө­нәҗәтләр, салаватлар әйтте.  

 

Тантана вакытында, Тәл­гат хәзрәт Таҗетдин: “Дүр­тенче майда РҮДН корылтае булачак, анда Камил хәзрәт Сәмигуллинны баш мөфти итеп сайлаячакбыз, улым Мөхәммәт – РҮДН рәисе, мин шәйхелислам булып калачакмын. Камил хәзрәт бүген үк Уфага барып утыра ала, анда аңа эш бүлмәсе җиһазландырылып куелган”, – дип белдерде. Соңрак бу турыда сорашкач, әлеге хакта беренче мәртәбә ишетәм, дип җаваплады Татарстан мөфтие. Мәгълүм булганча, Татарстан мөфтияте болай да үзәкләш­терелгән дини оешма дип атала. Әгәр мондый үзгәреш тормышка аша калган сурәттә, Татарстан мөселманнары, иң әүвәл үз корылтайларында киңәшләшеп, моңа ризалык бирергә, аннан соң гына өммәттәшләребез берләш­терү корылтаена җыелырга тиештер, шәт. Тантана вакытында Тәлгат хәзрәт РФДН рәисе Равил хәзрәт Гайнетдин тарафына да берләшү тәкъдиме ясады. Димәк, анда да, риза булган сурәттә, корылтай чакырып, берләшү мәсьәләсен хәл итәргә тиешләр.