01.12.2015 Җәмгыять

Гадәттән тыш хәлдә документларны сумкага тутырып куярга, азык һәм су запасы әзерләргә, балаларны авылга җибәрергә?

Башкаланың “Азино” микрорайонында яшәүчеләрнең күңеленә шом төшкән. Барына да күпкатлы йортларда пәйда булган игълан сәбәпче. Анда гадәттән тыш хәл чыккан очракта нишләргә кирәклеге турында мәгълүмат язылган.

Киңәш буларак документларны сумкага тутырып куярга, азык һәм су запасы әзерләргә, кибетләргә йөрмәскә, балаларны һәм карт әби-бабайларны авылга җибәрергә тәкъдим иткәннәр хәтта. Артыгын кыланып атмаганнармы? Әлеге сорауга җавапны “Ватаным Татарстан” хәбәрчесе дә эзләде.

“Мондый эчтәлектәге игъланны очраклы рәвештә генә элмәгәннәр, – дип борчыла Казанның Мамадыш тракты урамында яшәүчеләр. – Дөньядагы хәлләрне көн дә телевизордан күрсәтеп торалар бит. Әллә сугыш куркынычы яныймы икән?” Ике табак биттә урын алган әлеге мәгълүмат белән шактый кеше танышырга өлгергән инде. Арада халыкны махсус рәвештә куркыталар, дип фикер йөртүчеләр дә бар. Әлеге белешмәне кем таратуы турында бернинди мәгълүмат та язылмаган. Мәсьәләгә ачыклык кертү өчен Татарстан Эчке эшләр министрлыгына шалтыраттык. “Бу бездән чыккан мәгълүмат түгел”, – дип аңлаттылар министрлыкның матбугат хезмәтендә. Шуңа күрә рәсми рәвештә аңлатма бирүдән дә баш тарттылар.

Татарстан Гадәттән тыш хәлләр министрлыгында исә, террор куркынычы турында ишетүгә үк, сөйләшүдән баш тарттылар. “Әлеге мәсьәлә белән ЭЭМ һәм Федераль иминлек хезмәте генә шөгыльләнә”, – дип җавап бирү белән чикләнделәр министрлыкның матбугат хезмәтендә. Тик уң кул нишләгәнне сул кул белми булып чыкты, ахры. “Без профилактика чарасы буларак Татарстан Гадәттән тыш хәлләр министрлыгы тәкъдим иткән белешмәлекне бастырып тараттык кына, үзебез уйлап тапкан нәрсә түгел”, – дип аңлатты “Азино-1” идарә компаниясенең бүлек җитәкчесе Ләйсән Мортазина. Борчылмаска да киңәш итте. “Диварда мондый игъланнар пәйда булу – ниндидер куркыныч яный дигән сүз түгел. Халык гадәттән тыш хәл чыккан очракта нишләргә кирәклеген алдан ук белеп торырга тиеш. Моның бернинди дә зыяны юк”, – диде Ләйсән Мортазина.

“Татарстанның экстремизм, дискриминация һәм ксенофобияне өйрәнү үзәге” коммерцияле булмаган иҗтимагый оешмасы рәисе Вадим Козлов та шул ук фикердә. Аның әйтүенчә, дәүләт оешмалары тараткан хәбәрдән куркырга кирәкми. “Белү – белмәүдән яхшырак, – диде ул. – Гадәттән тыш хәл теләсә кайчан теләсә кайсы урында чыгарга мөмкин. Моннан беркем дә сакланмаган. Сүз теракт очраклары турында гына бармый. Табигать бәла-казасы да булырга мөмкин”.

Гомумән, мондый төр мәгълүматларны кискен кабул итәргә ярамый, ди Вадим Козлов. Ялган мәгълүмат таратып, халыкны куркуга төшерергә тырышучылар да әнә шуңа өмет итә бит. “Күптән түгел генә социаль челтәрләрдә Татарстанга 18 террорчының килүе турында ялган хәбәр таралды. Бу халык арасында коткы тарату, психологик вәзгыятьне катлауландыру өчен махсус эшләнә. Чөнки куркуга төшкән кешенең холкы үзгәрә, ул тиз кызып китүчәнгә әйләнә. Ә коткы таратучыларга шул гына кирәк”, – ди Козлов.

Теракт әзерләнү турында шигегез булса, гомумән, гадәттән тыш хәлләр турында кая хәбәр итәргә?

Телефоннан мөмкин кадәр тыныч сөйләшегез. Үзегезнең кем һәм кайдан булуыгыз, нәрсә табуыгыз турында әйтегез.

01 – Янгын сагы һәм Гадәттән тыш хәлләр министрлыгы

02 – Полиция

8 (843) 291-48-21 – Казан шәһәре буенча эчке эшләр идарәсенең дежур бүлеге

052 – Криминаль мәгълүматның аноним бюросы

03 – Ашыгыч ярдәм

8 (843) 231-45-55 – ТР буенча РФнең федераль куркынычсызлык хезмәте

112 – Бердәм коткару хезмәте (кесә телефоныннан шалтырату өчен)

Эльвира ВӘЛИЕВА
Ватаным Татарстан
№ --- | 27.11.2015