Татарстан туристларына Мисырга юлламаны Төркиягә алыштырырга тәкъдим итәләр

Мисырга очарга тиешле туристларга кичәгедән башлап Антальяга (Төркия) барырга тәкъдим итәләр. Бу хакта "Татар-информ" мәгълүмат агентлыгында узган матбугат конференциясендә "Natalie Tours", "Pegas", "Coral Travel" һәм "Anex Tour" туристлык операторлары вәкилләре белдерде.

Шулай итеп, «Анекс Тур» ҖЧҖ вәкиллеге директоры урынбасары Илфат Дәүләтшин белдерүләренчә, бүген Антальяга очарга теләүчеләр исемлеген төзиләр. Клиентларга Мисырдагы кунакханә категорияләренә туры килә торганны тәкъдим итәләр. Моннан тыш, Казаннан һәм Россиянең башка шәһәрләреннән кышкы курортларга очарга тәкъдим ителә.

«Пегас Туристик» ҖЧҖ вәкиллеге генераль директоры Инна Папшева белдергәнчә, бүген хезмәткәрләр клиентларга шалтыратып, ял итү юнәлешен алыштырырга, шул исәптән Анталья шәһәрен тәкъдим итәләр. "Баш тартучыларга нинди юнәлеш тәкъдим итүне 9 ноябрьдә хәл итәчәкбез", - диде ул.

"Natalie Tours" вәкиллеге директоры Татьяна Короткова, Казаннан Мисырга бары тик Хургада шәһәренә генә җибәрдек, диде. Хәзер компания туристларга юлламаларын БГӘ, Һиндстан яки Таиландка алыштырырга тәкъдим итә ала. Моннан тыш, туроператор турлар өчен акчаларны да кире кайтарырга әзер, диде Короткова. "Заявка язу зарур, дүшәмбедән караячакбыз", - диде ул.

"Мисырның куркынычсыз урын булуы турында рәсми белдерү юк", - дип билгеләп үтте Татарстан Республикасының Туризм буенча дәүләт комитеты рәисе Сергей Иванов.

Сүз уңаеннан, Төркиядә ял итәргә теләгән туристларның, авиасуднода кеше әз булу сәбәпле, оча алмый калган очраклар да еш була.