Рухы шат булсын

Редакциягә көтелмәгән хәбәр килеп иреште. Бу көннәрдә Нурлат районының “Дуслык” газетасы коллективы зур югалту кичерде. Редакциядә 15 ел эшләгән, баш мөхәррир урынбасары булган Илназ Мөбарәкшин якты дөньядан вакытсыз китеп барды. Илназның тор­мыш иптәше Лилия белән еш аралашып тордык. Газетабызга район хәбәр­ләрен җиткереп тора ул.

 Ачык күңелле, һәрчак ярдәмгә әзер бу ханым йөрәге ничек өзгәләнүен үзе генә беләдер. Кечкенә улларына иң кирәк чакта якты дөньядан китеп барган әтилә­рен кире кайтарып булмый инде. Әмма аның турында әйтелгән сүзләрне тыңлагач, кыска гына гомердә дә үзеңнән якты эзләр калдырып була икән, диясең.

“Ялны белмичә, кирәк икән, шимбә-ял көннәрендә эшкә чыга иде ул. Беркайчан да ”юк” ди­мәде. Бу атнабыз Илназсыз башланып китте. Ул бар эшне дә булдыра иде. Кирәк икән, газетаны калыпка сала, тәрҗемәчене дә алыштыра, фотоархивтан тиз генә кирәкле фотоны да табып бирә. Эшендә генә түгел, гаилә­сендә дә зур терәк иде. Бу югалтуны бик авыр кичерәбез”,– ди хезмәттәшләре.

Редакциядән:
“ВТ” коллективы да Мөбарәк­шиннар гаиләсенә килгән авыр кайгыны уртаклаша. Газиз кешең­не югалтудан да авыр хәсрәт юк. Илназның якыннарын нинди сүзләр әйтеп тә юатып булмый. Тирә-ягындагы кешеләр күңеленә кереп калган, игелекле эшләр башкарган Илназның рухы шат булсын иде.