Татарстан түрәләрен чыгыш ясарга өйрәтәчәкләр

Аудитория игътибарын җәлеп итү турында кайсы гына чыгыш ясаучы хыялланмый икән? Хәзер бу хыялны тормышка ашыру татарстанлылар өчен күпкә җиңелрәк булачак. Ник дигәндә, быелдан бездә “Халык алдында чыгыш ясарга өйрәнәбез” дигән проект старт ала.

Күпләр хәтерләгән “Клавиатурада соло” проекты авторлары идеясе бу. Ул Татарстан Хөкүмәте, Мәгълүматлаштыру һәм элемтә, Мәгариф һәм фән министрлыклары белән берлектә тормышка ашырыла.

- Шушы проектның нәкъ менә Татарстанда тормышка ашырылуы гаҗәп хәл түгел. Татарстаныбызда кеше потенциалына зур игътибар бирелә. Гомумән алганда, кеше үз тормышында формаль булмаган белем дә ала. Алар арасындаа коммуникацион күнекмәләр, компьютерда эшләргә өйрәнү, клавиатурада хәрефләр җыю кебекләре бар. 2013 елда “Клавитурада соло” проекты уңышлы гына башлап җибәрелде. Аның ярдәмендә хезмәт җитештерүчәнлеге артты, – диде мәгариф һәм фән министры урынбасары Тимерхан Алишев.

2015 елда исә яңа - “Халык алдында чыгыш ясарга өйрәнәбез” он-лайн мәктәбе эшли башлаячак. Аның ярдәмендә чыгышны ничек әзерләргә, аны ничек башларга, әйтелгән сүзләреңне ничек дәлилләргә – шушы һәм башка шундый күнекмәләрне үзләштереп булачак. Шунысы кызык, күпсанлы биремнәр арасында ике көн дәвамында бер дә сөйләшмичә йөрергә дигән бирем булган. Ләкин бер җитәкченең соравы буенча аны алып атарга туры килгән.

Моннан тыш, “уку планы”на паразит сүзләрдән котылу, дикцияне яхшырту,  ышандыра торган сөйләм, әңгәмәдәшеңне тыңлый һәм ишетә белү, ашыкмыйча сөйләүгә өйрәнү, сүзлек запасын арттыру кергән. Шушы күнекмәләргә ия булыр өчен “Клавиатурада соло” курсы сайтында (solo.tatarstan.ru) теркәлергә кирәк. Ә биремнәрне узар өчен интернетка тоташкан компютер, веб-камера һәм микрофон булуы зарур.

Проект авторы Владимир Шахиджанян исә әлеге проект дәүләт хезмәткәрләре өчен генә түгел, ә һәркем өчен ясалганын билгеләп үтте.

- Татарстанда “Клавиатурада соло” проекты Татарстанның ул чагындагы мәгълүматлаштыру һәм элемтә министры Николай Никифоров һәм республика Президенты Рөстәм Миңнеханов ярдәмендә тормышка ашырылды. Республика лидеры: “Әгәр мин өйрәнгәч, ник әле башкалар да өйрәнә алмасын?” - дип әйтте ул. Дөрес, Рөстәм Миңнеханов “Соло” курсын порталда теркәлеп түгел, ә индивидуаль рәвештә узды, – дип сөйләде Владимир Шахиджанян журналистларга.

Республика түрәләре “Клавиатурада соло” проектында бик актив катнашты. “Халык алдында чыгыш ясарга өйрәнәбез” дә алардан башка узмаячак.

Бар күнекмәләрне дә үтәүчеләрнең кеше алдында чыгыш ясау дәрәҗәсе ике тапкырга артачак, дип белдерә оештыручылар. Видео, аудио һәм текст рәвешендәге 100 материалны эшләгәннән соң, алар он-лайн рәвештә Мәскәү вузлары укытучылары, фиололог, актер, режиссерлар алдында имтихан тотачак.

Татарстанлылар әлеге курсны бушлай узарга мөмкин. Ә менә башка төбәкләрдә яшәүчеләргә мондый мөмкинлек бирелмәгән. Гадәттә, курс өчен кешегә елына 2 мең сум түләргә кирәк. Республикага бу проект күпмегә төшкәнен Мәгариф һәм фән министрлыгы вәкилләре әйтмәде. Киләчәктә Татарстанның әлеге тәҗрибәсен башка төбәкләр дә кулланыр, дип өметләнә проект авторлары. Хәзерге вакытта проект рус телендә аралашуга гына багышланган. Аның татар теле өчен варианты да эшләнерме икәне әлегә билгеле түгел.