"Өйләнешегез генә, беренче парга үз акчама кер юу машинасы бүләк итәм"

Инде менә районда бу мәсьәләгә тагын әй­ләнеп кайттылар. Тәвәккәл­ләп, кон­к­рет чарага ук тотынганнар. “Ак калфак” иҗти­магый оешмасының райондагы бү­лекчәсе һәм ЗАГС идарәсе берләшеп, таныштыру үзәге оештырганнар. Анда инде беренче чара да үткәргәннәр.

 

– Берәр чара үткәрә башласаң, районда ничектер һаман буйдаклар проблемасы белән “бәреле­шәсең”. Шуңа күрә бу хакта гел уйланып йөрдем, – ди бу башлан­гычның инициаторы, “Ак калфак”­ның райондагы бү­лекчәсе җитәк­чесе Зөлфирә апа Камалова. – Район Советы рәи­се урынбасары Наил Сабир­җановка шушы те­лә­гемне әйтеп, райондагы бар­лык буйдакларның тө­гәл санын белергә иде, дидем. Өч көн эчендә барлык үзида­рәләр­дән мәгъ­лүмат җыеп, кулыма тоттырды. 945 кеше! Кеп-кечкенә район өчен 30-50 яшьтәге шушы кадәр ялгызак булу бик күп, шулай бит? Нәрсә эшләп карыйк, дип мөрә­җәгать иткәч, кайбе­рәү­ләр, димче-яучы­лар эшен башларга кирәк, диде. Нигә­дер үзем монысын кабул итә алмадым. ЗАГС идарәсе җи­тәкчесе Зөһрә Әхмәт­ха­нова белән бу яктан фикер­ләребез туры килде – таныштыру үзәге булдырырга. Анда очрашулар, төрле чаралар үткәреп, яшьләр­нең үзлә­ренә сайлау-сай­лану мөм­кин­леге бирергә. Менә күптән түгел беренче очрашу да үткәрдек. Әллә ки­ләләр, әллә юк дип, куркып кына егерме кеше чакырган идек, унҗидесе килде. Димәк, кирәксенәләр дип сөендек. Бу очрашуга без Борнак авылында яшәү­че, алтын туйларын билге­ләп үтүче Гадения апа һәм Мөбарәкҗан абый Гариф­җановларны, Чутайдан унтугыз ел элек тормыш иптә­шен югалткан Нәкыйп абый­ны чакырдык. Га­риф­җа­­новлар тигез гомер итү­нең серләре белән уртак­лашса, Нәкыйп абый ялгыз карт­лыкның бик тә авыр булуын сөйләде.

 

Без исә шушы өл­кәннәр мисалында яшь­ләргә үрнәк бирергә те­ләдек. Мин үзем шушы бәй­рәмгә багышлап шигырь чыгардым, ә Соснадан танылган тальянчы Ягъфәр абый Хәбибуллин “Гашыйклар” дигән җыр язды. Беренче өлешен ЗАГС идарәсе бүлмәсендә, икенче өлешен китапханәдә үткәр­дек. Аерым бүлмә кирәк булачагын шунда аңладык. Район башкарма комитеты җи­тәк­чесе Рамил Шакировка мө­­рә­җә­гать ит­кән идек, бер­ничә көн эчендә мәсьәлә уңай хәл ителде дә. Димәк, икенче очрашуны үз бүлмә­бездә үткәрәчәкбез. Ә беренче чараны үткәрүдә исә Рә­симә Сәгыйтова кебек игелекле кешеләр матди ярдәм күрсәтте. Китапханә коллективы, “Ак калфак” оеш­масы активистлары да безгә теләп ярдәмгә килде. Мине иң сө­ендергәне шул: оештыручылар гына түгел, чарага килү­челәр дә аны ошатып, кирәк­леген аңлап китте. Инде анда катнашканнар гына түгел, бу турыда ишетеп-белгәннәр дә: “Тагын кайчан үткәрәсез?” – дип шалтырата. Хакимият­тәгеләр дә, ай саен үткә­регез, ди. Шушы көн­нәрдә үзәккә чын хуҗа да табылды: “Ак калфак” оеш­ма­сы­ның актив члены Гөлсинә Галиева җа­ваплы итеп бил­геләнде.

 

Зөлфирә апа сөйләгән­нәр­гә шуны гына өстәргә ки­рәк: әлеге чарада катнашкан район башкарма комитеты җитәкчесе урынбасары Ил­һам Гайнетдинов үз чыгышын беренче өйлә­нешүче пар­га үз акчасына автомат кер юу машинасы бүләк итәр­гә вәгъдә биреп тәмамлаган. “Өйләнешегез, тату гаилә корып, матур итеп яшәгез генә!” – дигән ул.

 

... Менә шундый күмәк омтылыш белән башланган эш тә нәтиҗә бир­мәсә инде...