МОСТАФИН КАМИЛ

Шагыйрь Камил Әхмәди улы Мостафин 1932 елның 26 ноябрендә Татарстанның Яшел Үзән шәһәрендә финанс хезмәткәре гаиләсендә туа. Татарстанның Саба районы үзәгендә – башлангыч, хәзерге Арча районының Яңа Чүриле авылында урта мәктәпне тәмамлаганнан соң, 1951–1956 елларда В.И.Ульянов-Ленин исемендәге Казан дәүләт университетының физика-математика факультетында математика белгечлеге буенча белем ала. 1956 елдан 1957 елга кадәр – Мәскәүдә, 1957 елдан Уралда яши һәм эшли. 1970 ул – Чиләбе шәһәре фәнни-тикшеренү институтында үз белгечлеге буенча өлкән гыйльми хезмәткәр. Бүгенге көндә К.Мостафин Мәскәү шәһәрендә яши, фәкать әдәби иҗат эше белән генә шөгыльләнә.

Камил Мостафинның «Вокзалда» исемле беренче шигыре 1956 елда «Татарстан яшьләре» газетасында басылып чыга. Шул вакыттан бирле оригиналь шигырьләре һәм русчадан шигъри тәрҗемәләре белән Татарстан көндәлек матбугатында даими катнашып килә. 1966 елда «Җыр сафка чакыра» исемле мөстәкыйль җыентыгын бастыра. Хәзер аның татар телендә һәм рус теленә тәрҗемәдә дөнья күргән дистәгә якын китабы бар. Моннан тыш К.Мостафинның шигырьләре төрле елларда татар һәм рус телләрендә Казан, Чиләбе, Мәскәү, Донецк нәшриятларында чыккан күмәк җыентыкларда, альманахларда, антологияләрдә һәм «Огонёк», «Юность», «Смена», «Советский воин», «Урал» кебек журналларда урын ала.

К.Мостафин – шигърияттә фикер һәм хиснең, эчтәлек һәм форманың гармоник төгәллегенә, җыйнаклыгына, сөйләм интонациясенең табигыйлегенә омтылучы шагыйрь. Аның әсәрләрендә заман темалары бүгенге техник интеллигенция вәкиленең үзенчәлекле шигъри фикерләве аша ачыла.

Хезмәт һәм фән өлкәсендә ирешкән уңышлары өчен К.Мостафин Хезмәт Кызыл Байрагы (1981), «Почет Билгесе» (1976) орденнары һәм ике медаль белән бүләкләнә.

К.Мостафин – 1981 елдан СССР (Татарстан) Язучылар берлеге әгъзасы.

ТӨП БАСМА КИТАПЛАРЫ

Җыр сафка чакыра: шигырьләр. – Казан: Татар. кит. нәшр., 1966. – 45 б. – 4000 д.
Һәркемнең үз йолдызы: шигырьләр. – Казан: Татар. кит. нәшр., 1968. – 59 б. – 3000 д.
Горур ташлар: шигырьләр. – Казан: Татар. кит. нәшр., 1972. – 88 б. – 3000 д.
Урман баласы: шигырьләр. – Казан: Татар. кит. нәшр., 1975. – 22 б. – 9000 д.
* * *
Ключ: стихи / пер. с татар. Л.Смирнова; вступит. статья Р.Мустафина. – Челябинск: Южн.-Урал. кн. изд-во, 1971. – 87 с. – 5000 экз.
Июньские ночи: стихи / пер. с татар. Л.Смирнова. – Челябинск: Южн.-Урал. кн. изд-во, 1975. – 95 с. – 5000 экз.
Сто первое чудо: стихи / пер. с татар. Л.Смирнова. – М.: Современник, 1976. – 78 с. – 10000 экз.

ИҖАТЫ ТУРЫНДА

Мустафин Р. Сто первое чудо // Р.Мустафин. Образ времени. – Казань: Татар. кн. изд-во, 1981. – С. 288–293.