МӨҖӘҺИТ

Балалар шагыйре Мөҗәһит Заһит улы Әхмәтҗанов (әдәби тәхәллүсе – Мөҗәһит) 1950 елның 15 декабрендә Татарстанның Мөслим районы Түреш авылында туа. Башлангыч белемне – туган авылында, урта белемне Күбәк авылы мәктәбендә алганнан соң, 1968–1973 елларда Казан дәүләт университетының тарих-филология факультетында укый. 1973–1975 елларда армиядә – Ерак Көнчыгышта офицер булып хезмәт итә. Хәрби хезмәт мөддәтен тутырып кайткач, берникадәр вакыт Мөҗәһит Мөслим районының Үрәзмәт урта мәктәбендә директор урынбасары булып эшләп ала, аннары 1982 елга кадәр район комсомол һәм партия комитетларында төрле җаваплы вазифалар башкара. 1982–1995 елларда ул – Мөслим урта мәктәбе директоры хезмәтендә, аннан соң шул ук мәктәптә татар теле һәм әдәбияты укытучысы булып эшли.

Мөҗәһит – бөтен әдәби иҗатын балаларга багышлаган шагыйрьләрдән. Мәктәптә укыган елларыннан ук ул татар балалар матбугаты – «Яшь ленинчы» (хәзерге «Сабантуй») газетасы һәм «Ялкын» журналы битләрендә шигырьләре белән катнаша башлый. Балалар өчен аның «Мин санарга өйрәнәм», «Матур булыйк», «Карга бураны», «Очты, очты...», «Әнием канатлары» исемле китапларын Татарстан китап нәшрияты, «Акыллыга сүз әйттем» дип аталган табышмаклар китабын «Мәгариф» милли нәшрияты бастырып чыгара.

Мөҗәһитнең балалар өчен язган шигырьләре иң элек теленең авылчан гадилеге, ихласлыгы белән аерылып тора. Аларда катлаулы сурәтләр, башваткыч вакыйга-интригалар юк, әмма һәр шигырьдә авыл дигән гаҗәеп дөнья өчен генә хас үзгә бер җылылык, нәзакәтлелек, кызыклы тормыш детале яки гыйбрәтле бер сабак-вакыйга бар.

Мөҗәһит Әхмәтҗанов гарәп хәрефләрен өйрәнүчеләр өчен «Күңел нуры» (1994), «Гарәп графикасы нигезендә элекке татар язуы» (2001) исемле уку әсбаплары, туган авылы Түреш турында тарихи очерк һәм Мөслим төбәгеннән чыккан каләм ияләре турында биографик белешмәлек китаплары авторы буларак та укучыларга билгеле.

Ул – халык мәгарифе отличнигы, Татарстан Республикасының атказанган укытучысы.

Мөҗәһит – 1995 елдан Татарстан Язучылар берлеге әгъзасы.

ТӨП БАСМА КИТАПЛАРЫ

Мин санарга өйрәнәм: балалар өчен шигырьләр. – Казан: Татар. кит. нәшр., 1993. – 48 б. – 15000 д.
Матур булыйк: балалар өчен шигырьләр, табышмаклар. – Казан: Татар. кит. нәшр., 1996. – 48 б. – 5000 д.
Карга бураны: балалар өчен шигырьләр, табышмаклар. – Казан: Татар. кит. нәшр., 1997. – 79 б. – 7000 д.
Очты, очты...: шигырьләр, телшомарткычлар, табышмаклар. – Казан: Татар. кит. нәшр., 2000. – 111 б. – 5000 д.
Акыллыга сүз әйттем: табышмаклар: латин хәрефләрендәге басмасы. – Казан: Мәгариф, 2003. – 47 б. – 8000 д.
Әнием канатлары: шигырьләр, әкиятләр. – Казан: Татар. кит. нәшр., 2005. – 127 б. – 5000 д.

* * *
Күңел нуры: гарәп графикасын өйрәнүчеләр өчен методик ярдәмлек. – Чаллы: КамАЗ, 1994. – 48 б. – 3000 д.
Түрешем: тарихи очерк. – Чаллы, 2001. – 54 б. – 300 д.
Гарәп графикасы нигезендә элекке татар язуы: методик ярдәмлек. – Чаллы, 2001. – 28 б. – 1000 д.
Якташ әдипләребез: очерклар. – Актаныш, 2002. – 52 б. – 1000 д.

ИҖАТЫ ТУРЫНДА

Гамбәров Н. Балачак // Татарстан. – 1994. – № 5–6. – 159 б.
Миңнуллин Р. Мөҗәһит Әхмәтҗанов // Р.Миңнуллин. Шагыйрь генә булып калалмадым. – Казан: Матбугат йорты, 1998. – 341–342 б.
Садриев Ф. Рухи энҗеләр өләшүче // Авыл утлары. – 2000. – 14 дек.
Миңнуллин Р. Педагог һәм шагыйрь // Ватаным Татарстан. – 2000. – 15 дек.
Миңнуллин Б. Балачак һәм батырлык // Б.Миңнуллин. Фәнни эзләнүләр юлында: мәкаләләр. – Алабуга: Алабуга пед. ин-ты, 2002. – 64–72 б.