ХӘЙРУЛЛИН ИЛДАР ЗИННУР УЛЫ

1950 елның 6 июнендә Казан шәһәрендә туа.

1970 елда Казан театр училищесын тәмамлый һәм Татар академия театрында эшли башлый. Соңрак үзе укыган училищеда, аннан Казан сәнгать һәм мәдәният академиясендә актерлык осталыгы буенча дәресләр бирә. Спектакльләр куя.

Хәйруллин — күпкырлы актер. Иҗатының башлангыч чорында баш рольләрдә яшь егетләрне уйнаса, соңыннан төрле характерлар һәм тискәре образлар тудыру остасына әйләнә.

Аның рольләре: Таймораз — «Борчылма, әнием» (Н.Думбадзе), Алим — «Эңгер-меңгер» (А.Гыйләҗев), Исмәгыйль — «Диләфрүзгә дүрт кияү», Григорий — «Ат карагы», Лауренсио — «Җүләр кыз» (Лопе де Вега), Таһир — «Мәхәббәтең чын булса» (Х.Вахит), Абдулич — «Һиҗрәт» (Н.Исәнбәт), Шагыйрь — «Моңлы бер җыр», Хәбир — «Сөяркә» (Т.Миңнуллин), Карандышев — «Бирнәсез кыз», Худобаев — «Җимерелгән бәхет» (А.Островский), Кияү — «Кияү белән кәләш» (М.Байҗиев), Ильяс — «Казан сөлгесе», Исмәгыйль — «Сүнгән йолдызлар» (К.Тинчурин), Максим — «Һаваларда йолдыз» (М.Горький буенча), Труффальдино — «Ике хуҗаның хезмәтчесе» (К.Гольдони), Җанбай — «Идегәй» (Ю.Сафиуллин), Карак — «Карак» (З.Хәким), Инсаф — «Әни килде» (Ш.Хөсәенов), Пеппино — «Гаугалы гаилә» (Эд.де Филиппо), Закир — «Мәхәббәт хатирәсе» (Ф.Бүләков) һ.б.

ТАССРның хал. арт. — 1991 ел.
РФ атказ. арт. — 1999 ел.