Ирландия, Эстония һәм Россия авторларының пьесалары тәрҗемә ителде

Махсус “Һөнәр+” V Халыкара яшь татар режиссурасы фестивале кысаларында үтәчәк режиссура лабораториясе өчен Казан шагыйрьләре Ирландия, Эстония һәм Россиянең бүгенге көн драматурглары иҗат иткән 4 пьесаны татар теленә тәрҗемә итте.

16-22 декабрьдә Казанда “Һөнәр+” V Халыкара яшь татар режиссурасы фестивале көтелә. Быелгы фестиваль кысаларында танылган театр эшлеклесе Олег Лоевский җиткчелегендә режиссура лабораториясе үтәчәк. Режиссура лабораториясе – театраль проектның үзенчәлекле бер формасы. Ул билгеләнгән вакытта, “бүген һәм хәзер”, режиссерның текст өстендә эшен, билгеле бер эскиз тудыруны, тар гына вакыт аралыгында спектакль караламасын булдыруны үз эченә ала. Лаборатория Камал театрында үтәчәк.

Лаборатория тәҗрибәсе өчен 4 пьеса сайланып алынды: «Жанна» Ярослава Пулинович (Россия), «“Шарур” кафесы» Анна Батурина (Россия), «Туй аралаш җеназа» Андрус Кивиряхк (Эстония) һәм Ирландия драматургы Брайен Фрилның «Тәрҗемә кирәк» пьесасы.

Махсус режиссура лабораториясе өчен Казан шагыйрьләре Эльвира Хадиева һәм Резеда Гобәева пьесаларны татар теленә тәрҗемә итте.

«"Жанна"ны татар теленә тәрҗемә итүләре минем өчен бик кызыклы күренеш! – ди Ярослава Пулинович. – Минем әбием татар булса да, үзем татарча белмим, тик барыбер пьесамның әбием теленә тәрҗемә итүләренә бик шатланам».

«Туй аралаш җеназа» пьесасы авторы әсәренең татар теленә тәрҗемә ителүенә бераз аптырап калды. «Дөресен генә әйткәндә, бу пьесамны мин Эстонлылар гына аңлый дип уйлый идем, - ди Андрус Кивиряхк. – Чөнки анда Эстонлылар тарихы, архетиплары. Еш кына, спектакль беткәннән соң тамашачылар: “Бу безнең тормышыбыз, туганнарыбыз, күршеләребез, дусларыбыз. Бөтен Эстония – бер гаилә диярсең” - дип әйтәләр. Димәк, әлеге текст татарлар өчен дә кызыклы һәм аңлаешлы булып чыга. Минем өчен бу бик кызык һәм моңарга шатмын!».

Искәртеп үтәбез, “Һөнәр+” фестивале спектакльләрен Камал театрының Зур һәм Кече сәхнәсендә, М.Сәлимҗанов исемендәге Актерлар йортында, беренче мәртәбә Тинчурин театрында һәм Казан яшь тамашачылар театры сәхнәсендә күрергә мөмкин “Һөнәр+” V Халыкара яшь татар режиссурасы фестивале Казанда 16-22 декабрьдә көтелә. Анда Яр Чаллы, Түбән Кама, Казан, Уфа, Күкштау (Казахстан) шәһәрләреннән төрле театраль мәктәп вәкилләре булган 15 яшь режиссер үзләренең спектакльләрен тәкъдим итә.