Долларны чикләргә кирәкме? (Сораштыру)

Кешеләр сумнарга караганда долларны күбрәк үз итә, шулай ышанычлырак, диләр. Россиядә соңгы өч елда долларны күбрәк сатып ала башлаганнар дигән хәбәр депутатларны да пошаманга салган. Эшләр болай бара алмый дип, ЛДПР партиясеннән депутат Михаил Дегтярев Россиядә долларның кулланылышын гына түгел, аларның банкларда да саклануын чикләргә тәкъдим итә.

Долларны кулланганнар тиз арада аларны йә тотып бетерергә, йә башка валютага күчерергә тиеш. Яңа канун уйлап табучылар, кешенең кесәсендә доллар табыла икән, полиция хезмәткәрләре аларны алып, 30 көн эчендә алмаштырып, хуҗасына кайтарачак, дип әйтә. Кибетләрдә дә валютаны алыштыру мөмкинлеге булырга тиеш. Банклар да долларны сатып алу эшен электрон рәвештә генә башкарырга тиеш, “наличка” булмаячак. Россиядә долларны чикләргә кирәкме? Сез акчагызны нинди валютада саклыйсыз?

Илсур АБДУЛЛИН, юрист:

– Доллар озак яши алмая­чак. Нефть белән газга һәрвакыт ихтыяҗ булачак, менә аларны долларга түгел, ә сумга сатсалар, доллар буш куык кебек шартлаячак. Без бит үзебез АКШка күкрәк киереп йөрергә ирек бирәбез. Россия товар сата, ә кергән акчаны алтын-валюта резервында доллар буларак саклыйбыз. Шуңа күрә американнар долларны бастырып тәк яталар. Әнә Кытай дөрес эшләде, үз валюталарын тотрыклы ясадылар. Россия АКШ колония­се түгел бит, без аларның файдасына эшләргә тиеш түгел, үзебезне кайгыртырга вакыт.

Рәшит ЗӘЙНУЛЛИН, укытучы:

– Бу гамәл зыянлы, чөнки долларның рәсми курстан тыш башка хакка сатылган долларлар килеп чыгарга мөмкин, ә бу сумның бәясен киметәчәк. Кемдер яхшы курс белән долларын алмаштырачак, кемгәдер, ә бу күпчелек гади кешеләр, намуссыз ке­шеләр белән эш итәргә туры киләчәк, аларны “кара базар” сатып алачак. Акчасын сумнарда сакла­ган­нарның эшләре хөр­тилә­­нәчәк. Минем үзем­нең артык акчам юк. “Кара көн­нәр”гә дип саклап карадык инде, ул акча янды. Булганына шөкер итәбез.

Марат ГАТАУЛЛИН, эшмәкәр:

– Бу – тузга язмаган закон проекты. Икътисад базары белән махсус манипуляция уены дип саныйм. Менә без сатабыз, алабыз, ләкин барлык очракта да сумнар белән эш ителә, чөнки законда шулай язылган. Долларны чик­ләп, тимер пәрдә корачаклар. Дол­­ларны кулланмыйча, аңа бойкот тудырып, сум­ның бәясен күтә­реп бул­мая­чак. Моның өчен илдә тотрыклы икътисад булуы мөһим, сә­нәгать, җитеш­терү артырга тиеш. Чит илләрне барыбер сум бе­лән түләт­терүгә кү­че­реп булмаячак, юк эш ул. Мин, гомумән, банкта акча сакламаска тырышам, бер валюта да тотрыклы түгел. Иң яхшысы – акчаны кү­чемсез милеккә яки кыйм­мәте югалмый торган башка матди байлыкка әйлән­дерү.

Нәҗибә САФИНА, шагыйрә:

– Нинди валюта турында сөйлисез сез? Россиядә халыкның күпче­леге – очны очка ялгап яшәүчеләр. Кеше акчасын тегендә-монда түли, ашарга ала да бетте-китте, авы­зыңны ялап куй. Банкларда акча белән әвеш-тәвеш китерерлек хәлдә түгелмен, кесәләр коры. Ә чынлап уйлаганда, сумны тотрыклы ясый алмагач, башкалардан күпсе­неп, аларга инквизиция ясау кирәкми дип саныйм. Берсен тыеп, икенчесен үсте­реп булмый.