Аллага кем якынрак?

Бер поп белән дуслаштым әле. Юк, поп кына түгел, христиан дөньясының бик зур шәхесе ул, йөзләрчә, меңнәрчә попларга белем биргән, аларга православие буенча бик күп лекцияләр, безнеңчә әйтсәк, вәгазьләр укып, сөйләп, дин кануннарын аңлатып яшәүче яшәүче зат ул. Хәзерге вазифасы — православие университетында проректор-ректорның иң ышанычлы урынбасары, ныклы таянычы.

Сүземне поп дип башлавымның сәбәбе шул гына: без, Ислам динендәге татарлар, урысларның дин башлыкларын поп дип кенә атарга күнеккән халык. Әйтик, алардагы дин әһеленең протоиерий дигән дәрәҗәсен беләсезме? Мин, яшерен-батырын түгел, шушы яшемә җитеп, андый вазыйфа барлыгын белми идем. Ә инде аның — протоиерийның сөйләүләрен шактый тыңлагач, аңа хөрмәтем арткач, бу хакта сезгә дә сөйләү теләге туды.

Аның исеме — Димитрий, фамилиясе Смирнов. Туган елы 1951. Әңгәмәләр вакытында аңа нинди генә сораулар яудырмыйлар. Хәтта, үртәлмәсме, дигәндәй, төртмәле сораулар да еш яңгырый. Ләкин, һәр тарафтан мәгълүматлы буларак, ул барысына да тыныч кына җавап бирә.

Тыңлаучыларның берсе:

— Император Николай православие динендә булганмы?

— Шулайдыр... Ләкин, лютеран динендәге хатынын бик яратканлыктан, ул хакта сөйләшмәскә тырышкан. Сөекле хатынының кәефе кырылмагае дип яшәгән...

— Коръән укыйсызмы?

— Укыйм. Миндә аның ике басмасы бар. Урысча укыйм. Ләкин христиан буларак укыйм.

Заманында Бөекбритания биләмәләрен арттыра барган саен гарәп илләреннән коллыкка меңнәрчә, хәтта йөз меңнәрчә коллар ташыган, аларны Европаның башка илләренә дә күпләп саткан. Рәхәт бит: коллар тамак хакына иң авыр, иң кара эшләрдә, кем әйтмешли, җир җимертеп эшли тора, ә болар үзләре уңайлы тормышка күнегә бара... Хәтта балалар белән мәшәкать чикмәү, гаиләләрдә ыгы-зыгы арттырмау, иркәләнеп кенә яшәү хакына нәселләренең үрчүенә дә чик куя башлыйлар. Әйтик, дәрәҗәле аксөякләр гаиләдә бер бала тууга да канәгатьлек хисе кичерәләр, икенчесен булдырырга авырыксыналар, ә ислам динендәге коллар, шәригать кануннарына хыянәт итмичә үрчегәннән-үрчи баралар. Алай гына да түгел, милләттәшләре, илдәшләре дә үз теләкләре белән агыла башлый Европага. Заманалар үзгәрә, законнар яңара барган саен коллар, “килмешәкләр” һәр илдә тулы һәм тигез хокуклы гражданнарга әверелә баралар, сәләт белән үз эшләрен, заманча әйтсәк, үз кәсепләрен табалар, мәчетләр, мәдрәсәләр салалар... Иң мөһиме — үрчиләр!

Хәзер инде Европаның борынгыдан килгән төп милләтләре куркуда: алар кими, ә мөселманнар арта. 2015 елда ук исламлы халык 45-50 миллионга җитәчәк икән! Инглизләр оныткан сыман кыланып яшәсәләр дә, бөекбританнар кебек үк урыслар да сизә мондый ихтималны. Христианлыкның хәлсезләнүен урыс милләтеннән булган дин әһелләре дә ачынып сөйләргә мәҗбүр. Шуларның берсе Димитрий Смирнов турыдан-туры болай ди:

—- Киләчәк — мөселманнарныкы! Алар Җиргә хуҗа булачаклар!

Шушы фикерен ныгыту өчен күргән-ишеткән вакыйгаларын да сөйләп үтә:

— Бер вакыт каршыма бер карчык килде дә: “Аңлатып бирә алмассыз микән... — дип сүз башлады. — Менә мин чиркәүгә барганда машина туктаткалыйм. Рульдә мөселман булса, ул миннән акча алмый. Үз анам кебек кешедән ничек акча алмыйм мин, ди. Кайчакларда мөселман шофёрлар бушлай өемә дә китереп куялар, кулымда авыррак нәрсәләрем булса, этажыма да күтәреп менгерәләр. Ә менә христиан, православный шофёрлар алар кебек түгел. Минем акча эшли торган хезмәтем бу, диләр”...

Шуннан сөйләгәннәрен Смирнов болай дип түгәрәкли:

— Димәк, мөселманнар Аллага якынрак!

Әйе, үз диндәшләре турында ачынып та, гарьләнеп тә сөйли ул:

— Мөселманнар балаларын ярата. Чечняда, мәсәлән, детдомнар (ятим балалар йортлары) юк. Ә менә православныйлар, католиклар мөселманнарга нинди “үрнәк” күрсәтә ала? Эчкечелек, фәхешлек, наркоманлык, үзара нәфрәт... Без Христостан нәрсә сорасак, ул шуны бирергә тиеш, дип уйлыйбыз. Үзебез Аның хакына бер нәрсә дә кылмыйбыз. Ә мөселманнар ничек дисезме? Алар Алла хакына гомерләрен дә кызганмыйлар! Гаиләләренең тотрыклыгы, ныклыгы хакына да батырлыкка баралар. Әйе, аларны “террорчылар” диләр инде... Ә безнең кызлар эстрадаларда йөри. Ярымшәрә килеш халык алдында бииләр... Оят беткән! Сигезәр мәртәбә кияүгә чыгулар, уналтышар тапкыр өйләнүләр...

...Кабатлап әйтәм, Смирнов ачынып, гарьләнеп сөйли... Үз дине өчен өзгәләнә, сызлана бахыр. Шундый мисаллар китерә-китерә халкын, прихожаннарын оялтырга, айнытырга, уятырга, дөньяга ачык күз белән каратырга тырыша. Аны тыңлаган саен минем үзәгемне дә гарьләнү хисе кимерә. Чөнки, татар буларак: “Менә без — мөселманнар нинди! — дип мактана алмыйм... Без үзебез дә урыслардан ким эчмибез, үзебез дә ярымшәрә килеш меңнәрчә милләттәшләребез алдында ботлар күтәрә-күтәрә биибез, җырлыйбыз, фәхешлек мәсьәләсендә дә калышмыйбыз. Мин үзем, мәсәлән, дүрт ирдән дүрт бала тапкан татар хатыннарын беләм, бишәр-алтышар хатыннан бала таптырган, шуның белән масаеп, ыржаеп көлүче “үземезнең” ирләрне дә еш күрәм.

Ярый, сез уйлана торыгыз, мин язмамны түгәрәкләү ягын кайгыртыйм.

Чыннан да, Европа нәрсә уйларга да белми хәзер. “Без коллар ташыган идек, үзебезнең киләчәгебезгә яңа хуҗалар алып кайтканбыз икән”, — дип кайгырышалар. Элекке колонизаторлар җыйган кол-мөселманнар шул илләрдә тулы хокуклы гражданнар хәзер. Алар үзләренең ата-бабалары яшәгән, үзләрен тудырган илләрне ватаннары дип саныйлар. Һәм алар хаклы!

Англиядә мөселманнарның якын елларда ук биш-алты миллионга җитәчәкләре исәпләнгән инде. Лондонның Көньяк өлешендә тупланганнары гына да ярты миллион хәзер. Йөзләрчә меңнәре, дәррәү кузгалып, намаз саен мәчетләргә тулалар. Ә инглизләр үзләренең гыйбадәт йортларына сирәк-мирәк кенә киләләр икән (бездәге урыслар кебек).

Юкка гына ачынмый Димитрий Смирнов, тиктомалга гына өзгәләнми.

Берлинда, 1922-1924 елларда ук 1200 гыйбадәтчене сыйдырырлык мәчет төзелгән һәм яңадан-яңалары төзелеп килә. Ә инде, белүемчә, Мәскәүдә шактый еллар буе бишенче мәчетне салу өчен кишәрлек “таба алмый” хакимият. Ә инде шул ук Мәскәүдә христианнар өчен храм, собор, чиркәүләрнең саны 800дән артканлыгын яхшы беләм. Тик, аларда гыйбәдәт кылучылар саны кимү юнәлешендә икән. Хәер, ул кадәресен Дмитрий Смирнов тәфсилләп сөйләде бит инде...

Франциядә дә кабат унбиш елдан мөселманнар 6 миллионга җитәр дип фаразлана. Кыскасы, Европада мөселманнар миллионнап үрчи. 1990-2013 еллар арасында дөнья мөселманнары бер миллиардка арткан. “Һай, бигрәк күп бит, хак микән?” дияр идең, рәсми саннарга ышанмый булмый.

Хуш, язмама соңгы ноктаны куйдым дип, каләмемне читкә этәргәндә әткәмнең бер васыяте искә төште... Мине ВЛКСМ өлкә комитеты алганнан соң, шуны әткәмә кайтып әйткәч, ул:

— Бу дөньяның хәлләре әүмәле дә тәүмәле, улым. Артык кызыллана күрмә! Бу кырык мирдән җыелган ил озак яши алмастыр. Бер нәрсә дә мәңгелек түгел, алданып яшәүдән саклан. Әллә нинди үзгәрешләр булыр әле, — дип, күз алдыма, бармагы белән дә төртеп, Коръәннең бер аятен күрсәткән иде. “Без каферләрнең җирләрен әтрафларыннан киметә барабыз. АллаҺ хөкем итә. Аның хөкемен кире кайтара алучы юк.” (13:41)

Шул аятьнең тормышка аша баруы түгел микән дөньядагы бу гыйбрәтләр?

Ә инде протоиерий Смирнов белән ничек дуслашуыма килсәк, интернет аша гына булды ул хәл... Диннәр турында мәгълүматләр эзләп казынганда килеп чыкты аның блогы. Ихлас сөйләүче бу шәхес белән танышасыгыз килсә, сез дә кереп чыгыгыз аның “өенә”. Урыс телендә: “Димитрий Смирнов о мусульманах” дип язсагыз, “ишекләре” киерелеп ачылачак аның. Үз динең белән горурлана белү өчен төрле яктан фәһемле булу да кирәк бит әле... Мин аңа, хәтта, ике-өч юллык рәхмәт хаты да язып җибәрдем шул ук блогта...