КИТАП ТУРЫНДА ИКЕ ХАТ

ЙОКЫМНЫ, ЖӘЛЛӘМӘДЕМ

"ТНВ" каналында "Китап" дигән тапшыруны күргәч, төнлә белән нинди китап күрсәтәләр икән дип, йокламыйча карадым, чөнки китап укырга яратам. Кеше өчен китап уку әйтеп бетергесез рухи азык бирә. Аларда яшәешнең төрле мизгелләре, гыйбрәтле мисаллар бик күп. Китапка бер тотынсаң, ахырга кадәр укымыйча туктамыйсың. Эш күп булса да, йокымны жәлләмичә китап укый идем. Мәрхүмә каенанам бер йоклап уяна да, минем китап укып утырганны күреп: "Писерь булырсың инде", - дия иде. Писерь үк булмасам да, укуымның нәтиҗәсен күрәм. Олыгайгач буш вакыт күп хәзер, хәбәрләр дә, шигырь дә язам, күңел гел иҗатка тартыла. Газета-журналлар укыйм, китапханә булмагач китаплар уку насыйп түгел. Укыйсы килгән барлык китапны да сатып алып булмый бит. Авыл кешеләре күп нәрсәләрдән мәхрүм шул.

Фәүзия ВӘЛИЕВА.

Апас районы, Түбән Биябашы авылы.

БӘЯСЕН КҮРДЕМ ДӘ...

Мин кечкенәдән китап укырга яратам. Авыл клубы китапханәсендәгеләрен  укып бетергәч, күрше авыл китапханәсеннән ташып укый идек. Безнең яшьлек чорында, 1950-80 нче елларда, бик күпләр йотлыгып китап укый иде шул. Китап белән кечкенәдән дус булсаң, олыгайгач та укыйсы килә икән. Яраткан язучыларның яңа әсәрләрен бик укып барасы килә дә, тик китап бәяләре генә "тешләшә".

Әле "Татарстан яшьләре"ндә Рабит  Батулланың мәшһүр кешеләр турындагы китабыннан өзекләр укыгач, ул китапны сатып алырга дип кызыгып, кибеткә кергән идем дә, бәясен күргәч, кире борылырга туры килде. Оныгыма гына берничә китап алдым, чөнки аларның бәяләре бик кыйммәт түгел иде.

Язучыларга гонорарларны күбрәк түләп, китап бәяләрен азрак киметсәләр, һай яхшы булыр иде дә соң! Иҗат эше бик вак, катлаулы, четерекле, күп түземлек сорый бит ул, шуңа иҗат әһелләренә хөрмәт һәм игътибар зур булса иде!

Сөмбелә АБДУЛЛИНА.

Яшел Үзән районы, Бишнә авылы.