Яшьлегем Яңа елы

Күңелне тынычландырып, узганнарны уйландырып, җиргә тып-тын гына ап-ак кар ява. Нигәдер әнә шул кар яуган мизгелләрдә хәтер еракта калган яшьлек хатирәләрен эзләп үз сандыгында актарына башлый. Менә бу юлы 1971 ел декабре искә төште.

Минзәлә совхоз-техникумының соңгы курсында укып йөргән ел иде ул. Үзенең көйсез һава торышы белән интектереп тә торды инде ул елның көзе. Декабрь аенда да әле Минзәләнең пычрак урамнарын резина итекләр белән ерып йөрергә мәҗбүр булдык. Быел Яңа елга карсыз гына керәбезме әллә дип борчылып йөргәндә, 30 декабрь көнне салкынайтып җибәреп, җиргә ап-ак кар яуды. Сөенүебезнең иге-чиге булмады, әлбәттә. Җитмәсә, куаныч өстенә куаныч дигәндәй, педагогия училищесында укучы классташ кызның мине училищеларында үткәрелүче бал-маскарадка кунакка чакыруын җиткерделәр.

Шулай итеп, кырык ел элек үткән 31 декабрь киче яшьлегемнең иң матур көннәренең берсе буларак истә уелып калды. Җәйге дәүләт практикасы вакытында агроном булып эшләп алган акчага ул чорда модага кергән киң балаклы чалбар тектереп, яңа пәлтә, пиджәк белән күлмәк алган идем. Шуларны киеп, үземне инде җиткән егеткә санап, бал-маскарадка киттем. Барышлый кибеткә кереп, классташ кызга Яңа ел күчтәнәче итеп, ике “Аленка” шоколады да сатып алдым.

Педучилищеның ишек төбендә мине классташ кыз каршы алды. Ул заманда Минзәлә педучилищесына мәктәпләрдә иң яхшы укыган бик актив егетләр-кызлар гына укырга керә ала иде, шуңа да бал-маскарад бик тә күңелле, матур узды. Уйнап-көлеп рәхәтләндек инде.

Төн уртасында кайтырга чыктык. Классташ кызны педучилищеның тулай торагына озата киттем. Хәзер дә уйлап гаҗәпләнеп куям: бигрәкләр дә инсафлы итеп тәрбияләгәннәр, күрәсең, безнең буынны, классташ кызны озата барганда култыклаудан ары китмәдем. Югыйсә бер-беребезгә бишенче сыйныфтан ук гашыйк идек без. Кайтып җиткәч, ул үзләренең тулай торагына кызлар белән Яңа елны каршыларга чакырса да, нигәдер кермәдем, яшь чак шул, кыенсынганмындыр, күрәсең. Хәзер кайчак искә төшә дә, җүләр дип, үземне-үзем битәрлим.

Тормыш бер мизгел кебек кенә икән ул, моңа олыгая башлагач кына төшенәсең. Үткәннәргә дә хәтердә генә кайтып аласың. Классташ кызны соңгы тапкыр күргәнгә дә 32 ел вакыт үтеп киткән инде. Күргән булмагангамы, ул бер дә үзгәрмәгәндер, элеккечә яшь килеш калгандыр кебек тоела.

...Урамда, уйландырып, ап-ак кар ява. Бөтерелгән кар бөртекләренә карап, яшьлегем Яңа елларын сагынам. Яңа ел, анысы, быел да килер-килүен, әмма хәзергеләре гадәти инде аның, сизелмичә генә үтә дә китә. Алай гына да түгел, һәр Яңа ел үткән саен тагын бер яшькә олыгаюыңны сизәсең. Көрсенерлек шул.