"Ришат Төхвәтуллин гына килеп җитә алмады"

"Ак барс" спорт сараенда узган ярышта 8 иҗади команда катнашкан. Уен нәтиҗәләре буенча җырчылар командасы җиңеп чыккан. Командада Илнар Ялалов, Инсаф Бадретдинов, Эдик Данилов, Риназ Фазлыйәхмәтов, Ислам Кәлимуллин һәм Азат Абитов булган. Без капкачы Азат Абитов белән хәбәргә чыктык.

 

– Футбол белән мәктәптән кызыксынам, уйныйм, ләкин җәрәхәт алганнан соң, йөгереп булмый, шуңа капкага бастым. Командабызның капитаны Фәрит Низамиев иде. Раяз Фасыйхов һәм Филүс Каһиров безгә көч биреп тордылар, җан аттылар,  нык булыштылар. Командаларга килгәндә, беренче уенны Чаллы алып баручыларына җиңелдек. Аннан Казан алып баручыларын, "Дуслык" җыелма командаларын һәм финалда "Блогерлар" командасын җиңеп кубок яулап алдык. 

– Курку хисе әзрәк бар иде, ләкин бу турнирда уйнау теләге зуррак иде. Бик әйбәт, дусларча күңелле атмосфера иде. Тамашачылар гына бик аз булды, кызганыч. Килгәннәре гаиләләре, балалары белән рәхәтләнеп ял иттеләр, – дип сөйләде Азат Абитов. 

 

Икенче урында калган "Татар блогерлары" командасы да уеннан алган яхшы эмоцияләре белән уртаклашты. Команданы туплаган Ринат Галиәхмәтов (интернет киңлекләрдә Татар малай буларак та билгеле) ярышта беренче тапкыр гына катнашмый. 

 

– 5 ел элек бу турнирда уйнап, команда белән 1 нче урын да яулаган идек. Бу юлы да команда туплап уйнап карарга булдык. Иң беренче эш итеп, Илназга яздым (Кызык-мызык), ул Илнарга чыкты, мин Талипка яздым, Талип язды Алмазга, менә шулай бер-беребезнең танышларына язып командага берләштек. Без болай да таныш идек, тик бу турнир безне тагын да берләштерде. Барыбыз да татар егетләре, кемнәрдер аккаунтларын рус телендә алып бара, шул гына. Блогерлар арасында дуслык көчле, егетләр арасында бернинди көнчелек юк, башкалар турында әйтә алмыйм, билгеле. Кеше ошамый икән, аның белән аралашмыйсың - бетте. Бик күңелле уен иде. Илназ баш белән шундый матур гол кертте, аннан Алмаз иң яхшы сакчы булды. Беренче тапкыр җыелып уйнаган команда өчен икенче урын алу - әйбәт нәтиҗә. Ярыштан соң, бөтен тән авырта инде (көлә). Шушы ук составта икенче елга да катнашырга язсын.  Үземә килгәндә, футболны бик яратам. Европаның бөтен командаларын беләм. Яраткан футболчым Роналдо Согуд Әмирлекләрендә уйнагач, хәзер аны да күзәтәм. Месси Америкада уйный, аны да карыйм. Гомумән, үзем таза булсам да, спортны яратам. Әти белән кечкенәдән футбол, хоккей, тенис, волейбол, баскетболны карап бардык, - дип уртаклашты Ринат.

 

Ришат Төхвәтуллинның да үз командасы булган. Кызганыч, Ришат үзе турнирга килеп җитә алмаган. Ришат Төхвәтуллин төркемендә эшләүче Илгиз Бәдретдинов сүзләренчә, турнирда уйнау аның күптәнге хыялы булган.

 

- Күптән команда белән футбол уйнап карыйсы килгән иде. Бер тапкыр да җыелып уйнаган булмады, беренче тапкыр турнирда уйнадык. Ришат килеп җитешә алмады, кызганыч. Шулай да ул күбрәк волейбол белән кызыксына. Арабызда профессиональ футболчы - Ленар Шәймөхәммәтов кына иде. Травмалар булмады, Аллаһка шөкер, - диде Илгиз.

 

Җиңүчеләр: 

1 урын – җырчылар командасы

2 урын – татар блогерлары командасы

3 урын – Чаллы Сириннәре