25.12.2023 Мәдәният

Татарстанның атказанган артисты Виктор Шәрәфетдиновкә 70 яшь (ФОТО)

Виктор Шәрәфетдинов бик яшьли, 1969 елда Габдулла Тукай исемендәге Татар дәүләт филармониясенең эстрада бүлегенә конкурс нигезендә кабул ителә һәм сөйләм жанры артисты буларак, башка бертөркем яшь башкаручылар белән Мәскәүгә – Бөтенроссия эстрада сәнгате остаханәсенә укырга җибәрелә.

Мәскәүдә ике ел дәвамында ул Нәзифә (Кашапова) Кәримова, Надия Низамиева, Мәрзия Вәлиева, Зәйтүнә Яруллина, Клара Хәйретдинова, Зиннур Нурмөхәммәтов, Рабига Сибгатуллина, Римма Ибраһимова, Эльба Закирова, Мөнир Мөхәммәтдинов, Рөстәм Юнысов, Татьяна Романова һәм башкалар белән бергә укый. Биредә ул пантомима, акробатика кебек оригиналь жанр сәнгате өлкәсе буенча да дәрес-күнекмәләр ала. Казанга кайтып, филармониядә эшли башлагач, бу артистлар «Сәхнәдә яшьләр» дигән программа белән Татарстан авыллары һәм Советлар Союзы шәһәрләре буйлап гастрольләргә чыгалар. Виктор Шәрәфетдинов герой-шагыйрь М. Җәлилгә багышланган «Үлмәс җыр» пластик-хореографик пантомима номеры белән концертларда аеруча популярлык казана торган була. Бер ел эшләгәч, Виктор Шәрәфетдинов армия сафларында хезмәт итә һәм янә Татар дәүләт филармониясенең эстрада артисты буларак эшчәнлеген дәвам итә.

Уку елларында ук ул биюче Эльба Закирова белән якыннан таныша, алар бергә иҗат итә башлыйлар, филармониядә эшли башлагач алар өйләнешәләр. Бәхетле гаиләнең тора-бара кызы һәм улы туа. Тормыш иптәше белән алар бергәләп яңа, парлы биюләр өйрәнеп сәхнәгә куялар. 1974 елда алар Бөтенроссия эстрада артистлары конкурсында «Чәйгә чакыру», «Цирк килде» хореографик номерлары белән катнашып, уңышлы чыгыш ясыйлар, дипломант исеменә лаек булалар. Бу конкурстан соң аларны бик күп чит илләргә гастрольләргә чакыралар: Чехия, Польша шәһәрләрендә, Татар дәүләт җыр һәм бию ансамбле составында Никарагуа, Африка илләрендә чыгыш ясарга насыйп була.

Филармониядә танылган җырчы Ренат Ибраһимов бригадасында эшләү елларында, алар Италия, Мальта кебек чит илләргә барып, татар мәдәниятен җиткерәләр. Шулай ук Зиннур Нурмөхәммәтов, Римма Ибраһимова эстрада төркемнәрендә чыгыш ясыйлар.

Виктор Шәрәфетдинов соңгы елларда конферансье, концертлар алып баручы да булды, танылган татар әдипләренең әсәрләрен җыр, пластика, музыка белән бәйләп, үзенчәлекле рәвештә тамашачыга тәкъдим итте. Татарстанның беренче Президенты М. Шәймиевнең инаугурация концертын алып баруны да Гүзәл Мостафина белән аңа йөклиләр. Хөкүмәт күләмендә узучы бик күп мәдәни чараларны, илебезнең бик күп төбәкләрендә узган Татарстан сәнгате көннәре – декада концертларын да еш алып барырга туры килә аңа.

Алар соңгы елларда Татар дәүләт филармониясе сәхнә ветераннары «Илһамият» клубы концертларында, төрле чараларда еш чыгыш ясадылар. Шулай ук Виктор абый озак еллар «Балкыш» республика фестивале гала-концертларының да даими алып баручысы булды. Эльба һәм Виктор Шәрәфетдиновларга иминлек, саулык, иҗат уңышлары телибез, озак еллар балалары, оныкларының шатлыкларына куанып яшәргә насыйп булсын.