20.12.2023 Сәясәт

Бүген Казанда Резидә Макуеваны соңгы юлга озаталар

Татарстан Дәүләт Советы матбугат хезмәте җитәкчесе Резидә Макуева белән хушлашу мәрасиме бүген була. Ул иртәнге сәгать 11дә «Курган» комплексында (Мамадыш тракты, 179 йорт) башлана, дип яза Татар-информ.

«Без ачык күңелле, яхшы кешене югалттык. Туганнарының һәм якыннарының кайгысын уртаклашабыз. Бу авыр көннәрдә сезгә көч һәм сабырлык телибез. Сезнең белән бергә кайгырабыз. Хушлашу мәрасиме чәршәмбе, 20 декабрьдә 11.00 сәгатьтә «Курган» зиратында узачак», - дип сөйләделәр Татарстан парламенты матбугат хезмәтендә.

Матбугат хезмәтендә хәбәр иткәнчә, Резидә Галимҗановна хезмәттәшләре һәм массакүләм мәгълүмат чаралары вәкилләре арасында абруйлы талантлы журналист, Татарстан парламент журналистикасы үсешенә зур өлеш керткән компетентлы җитәкче булды. Макуеваның хезмәт биографиясенең 30 елдан артыгы масс-медиа өлкәсе белән бәйле.

«2004 елның августында Резидә Галимҗановна Татарстан Республикасы Дәүләт Советы Аппаратына дәүләт хезмәтенә матбугат хезмәте җитәкчесе сыйфатында күчәргә чакыру алды. Бу елларда ул дәүләт хакимияте органнарының массакүләм мәгълүмат чаралары белән үзара хезмәттәшлегенең иң нәтиҗәле системаларының берсен булдыра алды», - диделәр Дәүләт Советы матбугат хезмәтендә.

Татарстан Дәүләт Советы матбугат хезмәте җитәкчесе Резидә Макуева озак вакытлы авырудан соң кичә вафат булды. Аңа 61 яшь иде.

---
Матбугат.ру
№ --- | 20.12.2023